Tarazda polıtsııa qyzmetkeri qylmystyń aldyn aldy

<p>ASTANA. KAZINFORM - Tarazda dámhanalardyń birinde pyshaq ustaǵan er adam kúzetshimen janjaldasqan. Polıtsııa qyzmetkeri buzaqyny toqtatyp, qylmystyń aldyn aldy, dep habarlaıdy Polisia.kz.</p>

3 qańtarda saǵat 05:00 shamasynda Taraz qalasyndaǵy kafelerdiń birinde masań kúıdegi 21 jastaǵy er adam mekeme kúzetshisimen janjaldasyp qalǵan. Ol kúzetshige kúsh kórsetip, pyshaqpen dene jaraqatyn salýǵa oqtalǵan.

Osy sátte kafede kúsheıtilgen tártipte qyzmet atqaryp júrgen polıtsııa qyzmetkeri der kezinde aralasyp, kúzetshini qorǵaı otyryp, aýyr qylmystyń aldyn alý sharalaryn júrgizdi.

Oqıǵa barysynda tártip saqshysynyń oń qoly jaraqat aldy. Alaıda ol óziniń ómiri men densaýlyǵyna tóngen qaýipti elemeı, qoıan-qoltyq tásilderin qoldanyp, basqa azamattardyń qaýipsizdigin qamtamasyz etti.

Jaraqatyna qaramastan, quqyq buzýshyny jedel-tergeý toby kelgenshe ustap turǵan.

Qazirgi ýaqytta kúdiktige qatysty QR QK-niń 293-baby (Buzaqylyq) boıynsha qylmystyq is qozǵalyp, tergeý amaldary júrgizilip jatyr.

Buǵan deıin Shymkentte jol ústinde tóbelesken júrgizýshilerge qatysty qylmystyq is qozǵalǵan bolatyn.