Tarazda Memlekettik rámizder kúnine oraı erekshe aktsııa ótti

TARAZ. QazAqparat – Taraz qalasynda QR Memlekettik rámizder kúnine oraı erekshe aktsııa uıymdastyryldy, dep habarlaıdy QazAqparat Taraz qalasy ákimdigine silteme jasap.

Qazaqstan Respýblıkasynyń Memlekettik rámizder kúnine oraı Taraz qalasy ákimdiginiń uıymdastyrýymen «Eltańbam – eldigim, kók týym – teńdigim!» atty patrıottyq aktsııa ótti. Aktsııasy aıasynda avto-moto-velosherý uıymdastyryldy.

Qaladaǵy «Jastar» alleıasyndaǵy «Sahna» alańshasynan bastaý alǵan sherýge qatysýshylar Tuńǵysh Prezıdent saıabaǵyna deıin ortalyq kóshelermen eki baǵyt boıynsha júrip ótti.

Onda 12-6 metrlik alyp týdy 30 volonter ustap júrse, odan bólek 30 áýesqoı veloshabandoz, 20 motobaıker, 40 avtokólik qamtyldy. Kólikterdiń aldyna túrli kólemdegi tý ilindi.

Qatysýshylar Tuńǵysh Prezıdent parkinde túıisip, sol jerde memlekettik ánurandy birge áýelete shyrqady.

Sondaı-aq, osy kúni «Qasıetti kók baıraǵy elimniń!» atty aktsııa aıasynda oblys ortalyǵynyń basty kóshelerindegi 15 turǵyn úıdiń qasbetine 60 Memlekettik Tý ilindi.

Mundaı sharalar oblystyń barlyq aýdan ortalyqtarynda da uıymdastyryldy.