Tarazda qylmystyq top 2,2 mlrd teńgeni qolma-qolǵa aqshaǵa aınaldyrǵan
«QR Qarjy mınıstrligi Qarjy monıtorıngi komıteti Jambyl oblysy boıynsha Ekonomıkalyq tergeý departamentiniń jedel-tergeý toby «STOP-Obnal» jedel-aldyn alý sharasy barysynda Taraz qalasy turǵyny 2012-2019 jyldar aralyǵynda qarajatty zańsyz qolma-qol aqshaǵa aınaldyrýmen aınalysqanyn anyqtady», - delingen Qarjy monıtorıngi komıtetiniń habarlamasynda.
Belgili bolǵandaı, jalǵan shot-faktýra jazý maqsatynda kúdikti óziniń týystary men senimdi tulǵalarynyń atyna 20-dan astam úlestes kásiporyn tirkegen. Іs júzinde jumystar oryndalmaǵan, qyzmetter de kórsetilmegen. Bul turǵyda kontragent-kásiporyndardyń bıýdjetke salyq tóleýden jaltarýyna jaǵdaı jasalǵan.
2017-2019 jyldar aralyǵynda osy turǵyn men onyń senimdi adamdary Jambyl oblysyndaǵy ekinshi deńgeıli bankterden 2,2 mlrd teńgeden astam somany qolma-qol aqshaǵa aınaldyrǵan. Bul fakti boıynsha Departament QR QK 216-babymen (jeke kásipkerlik sýbektisiniń is júzinde jumystar oryndalmaı, qyzmetter kórsetilmeı, shot-faktýra jazý maqsatymen asa iri kólemde zııan tıgizgen múliktik paıda alý) qarastyrylǵan qylmystyq quqyqbuzýshylyq belgileri boıynsha sotqa deıingi tergeý isin tirkedi.
«Jedel-tergeý tobynyń úılesimdi is-áreketi barysynda «ForteBank» AQ TÚQ-da 17 915 000 teńge somasyndaǵy qarajatty qolma-qol aqshaǵa aınaldyrý ústinde qylmystyq toptyń músheleri ustaldy. Aqsha qarajatynyń baqylaýda bolǵan jalǵan kásiporyndarǵa aýdarylyp, alynǵany anyqtaldy. Sotqa deıingi tergeý aıasynda uıymdasqan qylmystyq top músheleri turyp jatqan mekenjaılarda tintý júrgizilip, birkúndik fırmalardyń mórleri, noýtbýkter men kompıýterler tárkilendi», - delingen vedomstvo málimetinde.