Tarazda kúnine 1 myń tutynýshyǵa qyzmet kórsetetin ortalyq ashyldy

TARAZ. QazAqparat - Jambyl oblysy ortalyǵynda «Taraz sý» memlekettik kommýnaldyq kásiporny janynan tutynýshylarǵa qyzmet kórsetý ortalyǵy ashyldy, dep habarlaıdy QazAqparat.

Іrgesi 1959 jyly qalanǵan eski ǵımarat «Tsıfrlyq Qazaqstan» baǵdarlamasy aıasynda qaıta jańǵyrtýdan ótkizilip, ýaqyt talabyna saı jabdyqtaldy. Jańa nysan ishinde biryńǵaı qyzmet kórsetý zaly ornalasqan. Tólem qabyldaý kassalarymen qatar, basqa da qyzmet túrleri bir tereze qaǵıdaty aıasynda jumys isteıdi. Ortalyq bir kúnde 1 myń abonentke qyzmet kórsetýge qaýqarly.

Kásiporyn dırektory Marat Symaılovtyń aıtýynsha, mekeme búgingi tańda 96 myń abonentke, 5 myń jeke kásipkerge qyzmet kórsetip otyr.

«Bul ǵımarat 358 myń turǵyny bar qala halqynyń tólem jasaýyna, kásipkerlerdiń tehnıkalyq kelisimsharttardy esh kedergisiz alýyna múmkindik beredi degen senimdemin», - dedi ortalyqtyń ashylý saltanatynda Jambyl oblysy ákiminiń birinshi orynbasary Bekbolat Orynbekov.

Aıta keteıik, ortalyqtyń qurylys jumysyn «Atlas Konstrakshn» kompanııasy júrgizgen.

«Árbir abonent tólem túbirtegin alǵan soń, ony osynda kelip tóleýlerine jáne kelisimshartqa otyryp tehnıkalyq qyzmetter alýlaryna bolady. Onlaın júıesimen esep aıyrysatyndardyń da qatary kún sanap artýda. Al kásiporynda 700 qyzmetker jumys isteıdi. Sonymen qatar, sońǵy jyldary barlyq qural-jabdyqtarymyz ben tehnıkalarymyz jańartylǵan», - deıdi Marat Symaılov.