Tarazda koronavırýs juqtyrǵan 20 júkti áıel aman-esen bosanǵan
30 naýryz kúni juqpaly aýrýlar ortalyǵyna koronavırýs ınfektsııasy anyqtalǵan júkti áıel jedel járdemmen jetkizildi.
Aıy-kúni jaqyndaǵan 42 jastaǵy Taraz turǵynyn dárigerler aýrý túriniń kúrdeliligine qaramastan, eshbir asqynýsyz aman-esen bosandyryp aldy. Ómirge deni saý náreste keldi.
Ekijaqty pnevmonııa bolyp ókpesiniń 30 paıyzdan astamy zaqymdalyp, aýyr túrde bosanǵan anany qatań baqylaýǵa alǵan juqpaly aýrýlar ortalyǵynyń dárigerleri 10 kún boıy arnaıy vırýsqa qarsy terapııalyq em júrgizdi.
Nátıjesinde koronavırýs ınfektsııasynan tolyq aıyǵyp, qolyna balasyn alyp, aýrýhanadan shyqty.
«Aıaǵym aýyr bolǵandyqtan koronavırýsqa shaldyqqanymdy bilgende qatty qoryqtym. Aq halattylar 4 kún boıy jansaqtaý bóliminde meniń jáne sábıimniń ómiri úshin kúresti. Dárigerlerge myń alǵys! Qyzymdy aman-esen bosandym. Bul – meniń tórtinshi perzentim. Táýlik boıy qasymda bolyp, balam ekeýmizdiń janymyzǵa arasha túsken barlyq dárigerlerge alǵysym sheksiz. Meni jáne balamdy ajaldan arashalap qaldy. Dál men osy aýrýǵa shaldyǵamyn dep oılamaǵan edim. Sondyqtan, basqalardy barynsha saqtyq sharalaryn ustanyp júrýge shaqyramyn», - deıdi aýrýhanadan jazylyp shyqqan ol.
Dárigerlerdiń aıtýynsha, búginde ananyń da, sábıdiń de jaǵdaıy jaqsy. Jańa týǵan náresteniń synamasynan koronavırýs ınfektsııasy anyqtalmaǵan.
Atalǵan ortalyqtyń meńgerýshisi Erbol Ordabekovtyń sózinshe, aýrýhana 240 tósekke arnalǵan.
Qańtar aıynan bastap búgingi kúnge deıin 700-den astam naýqas jazylyp jáne dert juqtyrǵan 20 júkti áıel aman-esen bosanyp, otbasyna oralǵan.
Qazirgi ýaqytta ortalyqta 185 naýqas em-domyn qabyldaýda, olardyń 20-sy jansaqtaý bóliminde.
«Búginde aýrýhanamyzǵa dáriler tolyǵymen jetkizilýde. Qazir eki aıǵa jetetin dári-dármek qory bar. Turǵyndar talaptardy qatań saqtaýy kerek jáne keńinen júrgizilip jatqan vaktsınatsııa jumystaryna belsene qatysyp, óz densaýlyǵyna nemquraıly qaramaı, aýrýdyń aldyn alýǵa tyrysýy qajet» – dedi Erbol Ordabekov.