Tarazda kóppáterli turǵyn úılerge ystyq sý berile bastady
Kesheden beri «Tarazenergoortalyǵy» AQ-na qarasty RK-4 magıstrali boıynsha ystyq sý berilýin qamtamasyz etý qazandyǵy iske qosylǵan. Magıstraldiń sý-qubyr júıesi ystyq sýmen toltyrylýda.
Aıta ketý kerek, bıyl qalada ystyq sý taratý jumystary jyldaǵy jospardan bir aı erte bastaldy. Taraz qalasy boıynsha ystyq sý alatyn tutynýshylardyń jalpy sany - 610 turǵyn úı.
«Oblys ákiminiń tapsyrmasyna sáıkes, Taraz qalasynyń tutynýshylaryn 11 qyrkúıekten bastap ystyq sýmen qamtamasyz etý jumystary bastaldy. «Tonkýrýsh», «Sátpaev», «Teletsentr» massıvterine jáne qala ortalyǵynyń birshama bóligine ystyq sý 1 qazanǵa qaraı, jóndeý jumystary aıaqtalǵannan keıin beriledi»,-dep málim etti oblys ákimdigi energetıka jáne turǵyn úı kommýnaldyq sharýashylyq basqarmasynyń jylý-energetıka bóliminen.
Sondaı-aq, onyń aıtýynsha qala tutynýshylaryn ystyq sýmen qamtamasyz etý, jylytý maýsymyna deıin úzdiksiz júzege asyrylmaq.