Tarazda kópbalaly analar óz aýlasyn dezınfektsııalap jatyr

TARAZ. QazAqparat – Tarazdyqtar «Óz aýlam – óz densaýlyǵym» atty aktsııa aıasynda óz aýlasyn dezınfektsııalaýda, dep habarlaıdy QazAqparat Jambyl oblysy ákiminiń baspasóz qyzmetine silteme jasap.

Tarazda koronavırýs pandemııasyna baılanysty kópbalaly jáne az qamtylǵan otbasylar ózderin jáne jaqyndaryn qorǵaýǵa kiristi. Atap aıtar bolsaq, «Qarasý» móltek aýdanyndaǵy 180 páterli jataqhana turǵyndary ózderi turatyn turǵyn úıdi dezınfektsııalaý boıynsha aktsııa ótkizý bastamasyn qolǵa aldy. Olardyń ótinishine qalalyq ákimdik qoldaý bildirdi.

Aktsııa barysynda kópbalaly analarǵa qolǵap, medıtsınalyq maskalar jáne dezınfektsııalaý quraldary tegin úlestirildi. Al «Aqjúnis» qoǵamdyq birlestiginiń ókilderi kópbalaly jáne az qamtylǵan otbasy múshelerine myńnan astam medıtsınalyq maska taratty. Analar jataqhananyń barlyq kireberisteri men esikterin, tutqalar men balalar oıyn alańshasyn muqııat dezınfektsııalady.

Turǵyndar atalǵan aktsııany bir ret qana ótkizip qoımaı, turaqty túrde qolǵa alyp, sanıtarlyq jumystardy aptasyna birneshe ret júrgizýdi josparlap otyr. Olar oblys ortalyǵynyń barlyq turǵyndaryn osy ıgi bastamany qoldaýǵa ári jalǵastyrýǵa, óz páterleri men úılerin qaýipsizdendirýge shaqyrady.

Aıta ketý kerek, óńirde tórt merdiger kompanııanyń kúshimen adamdar kóp jınalatyn oryndarda dezınfektsııa sharalary júrgizilýde. Kúnine eki ret qoǵamdyq kólik pen aıaldamalar dezınfektsııalanýda desek, mundaı jumystar «Aýyl bereke», Ortalyq jáne «Qaıqarmet» bazarlarynda da atqarylýda.