Tarazda «Kazagrozhambyl-2024» halyqaralyq aýyl sharýashylyǵy forým-kórmesi ótip jatyr

<p>TARAZ. KAZINFORM &ndash; Tarazda alǵash ret &laquo;Kazagrozhambyl-2024&raquo; halyqaralyq aýyl sharýashylyǵy forým-kórmesi bastaldy. Aýyl sharýashylyǵy salasyndaǵy ozyq úlgidegi sońǵy qurylǵylar men tehnıkalar, tyńaıtqysh túrleri, preparattar qaıta óńdeýdiń ádis-tásilderi usynylǵan kórmeniń alǵashqy kúni &laquo;Kóne Taraz&raquo; kesheninde uıymdastyrylýda.</p>

Forýmǵa Qazaqstan, Ázerbaıjan, Ózbekstan aýyl sharýashylyǵy mınıstrleri, Túrkııa, Qyrǵyzstan vıtse-mınıstrleri, Túrki memleketi uıymynyń Bas hatshysy, Vengrııanyń Almaty qalasyndaǵy bas konsýly, sondaı-aq Qytaı, Nıderland, Reseı jáne t. b. jalpy sany 12 eldiń 150-den astam kompanııalarynyń ókilderi qatysýda.

Foto: Kórme uıymdastyrýshylarynan

Kórme-forýmnyń negizgi bólimderi aýyl sharýashylyǵy tehnıkasy jáne olardyń qosalqy bólshekteri, tuqym jáne mal sharýashylyǵy, tamaq, qaıta óńdeý ónerkásibine arnalǵan jabdyqtar taqyrybynda ótedi.

Nátıjesinde Taraz qalasynda 1-shi halyqaralyq kórme-forýmdy ótkizý oblystyń qolaıly ınvestıtsııalyq ahýalyn damytýǵa jańa serpin beredi, bul óz kezeginde iri álemdik agrokontsernder men óndirýshilerdi tartady, bul ónim eksporty úshin jańa naryqtar ashady, agroekonomıkany ártaraptandyrýǵa jaǵdaı jasaıdy.

Foto: Dýlat Shyqpanbetov

Jambyl oblysynyń ákimdigi men otandyq kásipkerlerge Túrki memleketteri jáne ekonomıkalyq yntymaqtastyq uıymy elderiniń sheteldik ınvestorlary arasynda agrarlyq klasterdi damytý boıynsha strategııalyq kelisimder men memorandýmdarǵa qol qoıýǵa múmkindik beredi.

Forým barysynda sondaı-aq, halyqaralyq jáne otandyq sarapshylar, mamandar aýyl sharýashylyǵy salasyndaǵy sońǵy jańalyqtar men ınnovatsııalardy, tuqym sharýashylyǵyn damytý, aýyl sharýashylyǵy tehnıkasyn jańartý, jylyjaı bıznesi jáne aýyl sharýashylyǵy ónimderin qaıta óńdeý máseleleri talqylanady, dep kútilýde.

Foto: Dýlat Shyqpanbetov

Úsh kúnge sozylatyn forým aıasynda TMU aýyl sharýashylyǵy mınıstrleriniń 3-keńesi uıymdastyrylady. Delegatsııa basshylarynyń qatysýymen ECOSA tuqym sharýashylyǵyndaǵy 8-kongresi ótedi. Josparlanǵan B2B kezdesýleriniń nátıjesinde birqatar kelisimshartqa qol qoıylady, dep kózdelýde.

Forým 21 naýryzǵa deıin jalǵasady. Delegattardy oblystaǵy qus fabrıkasymen, jem óńdeý zaýytymen jáne aýdandardaǵy ózge de birqatar nysanmen tanystyrý josparlanýda.

Osyǵan deıin Tarazda «Kazagrozhambyl-2024» Halyqaralyq aýyl sharýashylyǵy forým-kórmesi ótetinin habarlaǵan edik.