Tarazda káriz sýyn tazartý máselesi 2028 jyly sheshiledi

<p>TARAZ. KAZINFORM &ndash; Qazirgi ýaqytta Taraz káriz sýy tazartylmaıtyn jalǵyz oblys ortalyǵy bolyp otyr. Jergilikti ákimdik agenttik tilshisine jańa tazalaý qondyrǵysynyń qashan ashylatynyn aıtyp berdi.&nbsp;</p>

Qalanyń qaldyq sýy 200 gektardan asatyn súzgi alqabyna tógiledi jáne jerge sińý, býlaný arqyly tazarady. Táýligine 70 myń tekshe metr shaıyndy sý túskendikten, bul alqaptyń ózi jetkiliksiz. Oǵan qosa, káriz sýynyń jerasty sýlaryna aralasyp, turǵyndardy aýyz sýdan aıyrý qaýpi tónip tur. Jergilikti ákimdik bul túıtkildi másele 2028 jyly túbegeıli sheshiledi dep ýáde berip otyr.

«Jańa keshen qurylysyn bastaý úshin Eýrazııalyq damý bankimen kelissózder júrgizildi jáne 250 mln teńge grant bólinip, jobanyń tehnıkalyq-ekonomıkalyq negizdeý jumystaryn qarjylandyrdy. Bul negizdemeni slovenııalyq CECT Consulting kompanııasy ázirledi jáne memlekettik saraptamaǵa ótkizdi. Endi ERS kelisimin jasaý úshin Eýrazııalyq damý banki konkýrs ótkizedi. Oǵan halyqaralyq deńgeıdegi qurylys kompanııasy qatysady. Qoryta aıtqanda, 2025 jyly qurylysty bastap, 2027 jyly aıaqtaý kerek. Osylaısha, 2028 jyldan bastap, shaıyndy sýlar tolyq tazartylatyn múmkindik bolady», - dep túsindirdi qala ákiminiń orynbasary Q.Ismaıl.

Buǵan deıin Parlament qabyrǵasynda Tarazdaǵy káriz sýyn tazalaý qondyrǵysynyń bolmaýy kóterilgen edi.