Tarazda kárizdi tazartatyn júıe bolmaǵandyqtan sý sapasy nasharlap barady
Mınıstr óz sózinde jalpy respýblıka boıynsha mınıstrlik qyzmetiniń negizgi máselelerin, sondaı-aq Jambyl oblysy boıynsha máselelerdi sóz etti.
Munda atmosferalyq aýanyń lastanýy, qaldyqtardy basqarýdyń jetilmegen júıesi, eskirgen káriz tazartý qurylǵylary jáne Taraz qalasynyń ónerkásiptik bóliginde «Qazfosfat» seriktestiginiń qaldyqtar (fosfogıps) úıindisi úlken másele sanalady.
Jambyl oblysyndaǵy ekologııalyq máselelerdi sheshýdiń jol kartasynda 15 is-shara qarastyrylǵan. Onyń 5-i aıaqtaldy.
Turǵyndardyń narazylyǵyn týdyratyn taǵy bir másele – Taraz qalasynda kárizdik tazartý qurylǵylarynyń bolmaýy.
Taraz – tazartý qurylǵylary joq jáne aǵyndy sý eskirgen fıltratsııa alańdaryna aǵatyn jalǵyz oblys ortalyǵy.
Tazartý qurylǵylarynyń bolmaýy Jambyl aýdanynyń jaqyn ornalasqan eldi meken turǵyndary úshin aýyz sý sapasynyń nasharlaýyna alyp keledi, sondaı-aq aýyl sharýashylyǵy jerleriniń batpaqtanýyna jáne eldi mekenderdi sý basýyna sebep bolady.
Osyndaı jaǵdaı oblystyń barlyq aýdandarynda jáne onyń ishinde Shý, Jańatas, Qarataý sııaqty shaǵyn qalalarynda da bar.
Oblys ákimdiginiń aqparaty boıynsha, Taraz qalasynda jańa kárizdi tazartý keshenin salý josparlanǵan.
«Tótenshe ekologııalyq jaǵdaıdy boldyrmaý úshin ákimdik bul jumysty jedeldetýi qajet», - dep atap ótti mınıstr.
Sonymen qatar, máselelerdi sheshý úshin ákimdik qatty turmystyq qaldyqtar polıgondarynyń jaı-kúıin jaqsartý jáne olardy tıisinshe jaılastyrý jóninde sharalar qabyldaýy qajettigi aıtyldy.
Sondaı-aq, óńirdegi kommýnaldyq qaldyqtardy basqarý jaǵdayı týraly halyqty habardar ete otyryp, kommýnaldyq qaldyqtardy jınaý, suryptaý jáne qaıta óńdeý salasynda shaǵyn jáne orta bıznes sýbektilerin belsendi tartý jáne keshendi jumys úshin ákimdik kommýnaldyq qaldyqtardy basqarý jónindegi baǵdarlamany ázirlep, bekitýi qajettigi sóz boldy.
Sonymen birge Jambyl oblysy jerasty sýynyń barlanǵan qorynyń sany boıynsha respýblıkada úshinshi orynda jáne tuşy sýmen eń mol qamtamasyz etilgen óńirlerdiń qatarynda.
Paıdaly qazbalardyń ishinde ıgerilýi jáne barlanǵan qory boıynsha fosforıtter basym, olardyń qory Qarataý fosforıttik basseıninde shoǵyrlanǵan.
5 jyldyq kezeńde el boıynsha jer qoınaýyn 680 myń sharshy shaqyrymnan astam aýmaqta, onyń ishinde Jambyl oblysynda 26 myń sharshy shaqyrym aýmaqta óńirlik geologııalyq zertteý júrgizý josparlanǵan.
Jambyl oblysynda jańa sýarmaly jerlerdi engizý boıynsha belsendi jumys júrip jatyr.
Máselen, Dúnıejúzilik bank pen Eýropalyq qaıta qurý jáne damý bankiniń nesıesi esebinen oblystyń sý sharýashylyǵy jáne gıdromelıoratıvtik júıelerin qaıta qurý boıynsha eki joba júzege asyp jatyr.
Joba 6 aýdanda 315 kanaldy qaıta jańǵyrtýdy kózdeıdi. Bul 66,3 myń gektar sýarmaly jerdi sýmen qamtamasyz etýdi jaqsartýǵa múmkindik beredi.
Tasqyn sýdy jınaqtaý úshin 2025 jylǵa deıin 6 aımaqta 8 jańa sý qoımalaryn qurý josparlanýda, onyń ishinde Jambyl oblysynda: Yrǵaıty, Qalǵuty jáne Aqmola 3 sý qoımalary salynady.
«Balyq sharýashylyǵyn damytý salasynda da birqatar jumys júrgizildi. Salany damytýdyń 2030 jylǵa deıingi baǵdarlamasy bekitildi. Baǵdarlamaǵa sáıkes 2030 jylǵa deıin óńir boıynsha 8 myń tonna balyq ósirý josparlanǵan. Jyl basynan beri 464 tonna jospardan 483 tonna (104 paıyz) balyq ósirildi. 2021 jyldan bastap, jalpy qýaty 1,7 myń tonna 14 ınvestıtsııalyq joba júzege asyp jatyr»,- dep túıindedi S.Brekeshev.
Óz baıandamasynyń sońynda Ekologııa mınıstri jınalǵandardyń suraqtaryna jaýap berdi.