Tarazda «Handyqtyqtyń týyn tikken kıeli ólke» kitabynyń tusaýkeseri ótti

TARAZ. QazAqparat – Jambyl oblysynyń ákimi Berdibek Saparbaev Sh.Murtaza atyndaǵy «Rýhanııat jáne tarıhtaný» ortalyǵynda shyǵarmashylyq zııaly qaýym ókilderimen kezdesti. Júzdesý barysynda «Ádebı ólke» jobasy aıasynda «Handyqtyqtyń týyn tikken kıeli ólke» kitabynyń tusaýkeseri ótti, dep habarlaıdy QazAqparat tilshisi.

Erkin formatta ótken kezdesýde kórnekti qoǵam qaıratkerleri, jazýshylar, aqyndar rýhanı jáne mádenı qundylyqtar jónindegi ózekti máselelerdi saralady.

Berdibek Saparbaev aldymen oblystyń bıylǵy nátıjelerine qysqasha toqtalyp ótti. Ol ekonomıkalyq boljamdar júz paıyzǵa nemese odan da artyǵymen oryndalatynyn senimmen jetkizdi.

«Aýqymdy josparlar júzege asyrylýda. Koronavırýstyq daǵdarysqa qaramastan, bizdiń óńir jaqsy kórsetkishterge qol jetkizdi. Memleket basshysynyń jáne úkimettiń qoldaýynyń arqasynda biz kóptegen aýyldardy sýmen jáne gazben qamtamasyz ete aldyq, áleýmettik nysandar saldyq, joldardy jóndedik. Jambyldyqtarǵa áleýmettik kómekke shamamen 45 mıllıard teńge bólindi. Árıne, sheshimin kútken máseleler áli de joq emes. Turaqty saýalnamalar júrgizilip, alańdatarlyq núkteler anyqtalýda. Máseleler kezeń-kezeńimen sheshimin taýyp jatyr», - dedi oblys ákimi.

Óńir basshylyǵy áleýmettik-ekonomıkalyq kórsetkishterdi jaqsartýǵa ǵana emes, mádenı salany damytýǵa da nazar aýdarýda.

Ol Jambyl jeri árqashan talanttarǵa baı bolǵanyn, aqyn-jazýshylar jas urpaqty tárbıesinde jarqyn ónege bolyp tabylatyndyǵyn basa aıtty.

Sondaı-aq, Qazaqstan Jazýshylar odaǵynyń tóraǵasy, QR Eńbek sińirgen qaıratkeri, aqyn Ulyqbek Esdáýlet sóz sóıledi.

«Áýlıeata topyraǵynan týǵan talantty aqyn-jazýshylar kóp.

Olardyń arasynda aıtýly jazýshy jáne jýrnalıst Sherhan Murtazany, qazaq ádebıetiniń qazirgi zamanǵy klassıgi Nesipbek Dáýtaıulyn, aqyn, Memlekettik syılyqtyń laýreaty Kúlásh Ahmetovany aıryqsha ataýǵa bolady. Qazaqstan Jazýshylar odaǵy qazirgi jas talanttardy tanytýǵa nıetti», - dedi ol.

Ulyqbek Esdáýlet Jambyl oblysynda respýblıkalyq ádebı festıval ótkizýdi usyndy. B. Saparbaev bul ıdeıany qoldady.

Belgili jazýshylar men aqyndar shyǵarmashylyq mamandyq ıelerine kórsetken qoldaýy men iltıpaty úshin oblys ákimine alǵys aıtyp, óz usynystaryn ortaǵa saldy. Olar múmkindiginshe mádenı is-sharalardy kóptep ótkizý kerektigin alǵa tartty. Sonymen qatar, olar óńirdegi

mádenı-tarıhı muralardy saqtaý máselelerine de toqtaldy. Bul – asa mańyzdy. Óıtkeni, Taraz – bizdiń tarıhymyzdyń besigi.

Bul kúni jergilikti jas aqyndar Tabıǵat Abaıldaev, Danııar Álimqul jáne Nurjan Qadirálige Qazaqstan Jazýshylar odaǵynyń kýálikteri tapsyryldy.

Jazýshy-dramatýrg Elen Álimjanǵa, aqyndar Qaıyrbek Asanov pen Shyryn Mamaserikovaǵa 75 jyldyq mereıtoılaryna oraı Qazaqstan Jazýshylar Odaǵy tóraǵasynyń quttyqtaý hattary tabystaldy.