Tarazda esirtki jarnamalaıtyn 148 graffıtı joıyldy
Jambyldyq polıtseıler oblys ákimdiginiń jastar saıasaty máseleleri basqarmasynyń qyzmetkerlerimen jáne eriktilermen birlesip, esirtki satatyn saıttardy jarnamalaıtyn Taraz qalasynyń úıleri men ǵımarattarynyń qabyrǵalaryndaǵy graffıtı jazýlardy joıdy. Reıd barysynda qaladaǵy 148 jazba joıyldy.
Sonymen qatar, Jambyl oblysynyń PD Esirtki qylmysyna qarsy is-qımyl basqarmasynyń qyzmetkerleri ınternette monıtorıng júrgizý barysynda osyndaı Telegram paraqshalaryn anyqtady. Qazirgi ýaqytta atalǵan arnalar buǵattaldy, saıttar men jazbalardy ornalastyrýǵa qatysy bar adamdardy anyqtaý jáne ustaý boıynsha izdestirý júrgizilýde.
«Graffıtı jazǵany jáne ınternette kórsetilgen málimetterdi taratqany úshin QR QK 299-1-babynyń 1-bóligi boıynsha 3 jylǵa deıin bas bostandyǵynan aıyrý, 2-bóligi boıynsha 3 jyldan 6 jylǵa deıin bas bostandyǵynan aıyrý jazasy kózdelgen. Esirtkige jarnama jasaıtyn tulǵalar esirtki zattaryn ótkizgeni úshin jaýap beredi jáne QR QK 297-baby boıynsha qylmystyq jaýapkershilikke tartylady», - dedi Jambyl oblysynyń PD Esirtki qylmysyna qarsy is-qımyl basqarmasynyń bastyǵy Asqar Jumabekov.