Tarazda eshqandaı bazar jabylmaıdy - ákim
Oblys ortalyǵyndaǵy bazarlar men ózge de saýda oryndaryn qoldanystaǵy zańnama talaptaryna saı keltirý jáne basqa da uıymdastyrý máseleleri týraly ótken jıynda óńirdegi irili-usaqty saýda oryndarynyń jaı-kúıi jan-jaqty talqylandy.
Qazirgi tańda oblysta 43 saýda bazary bar. Onyń 29-y jańǵyrtýdy qajet etedi. Al, Taraz qalasynda 19 bazar tirkelgen. Onyń 17-si - ámbebap, ekeýi - mamandyrylǵan bazar.
«Búginde Taraz qalasyndaǵy 5 iri saýda ornynda keshendi tekseris júrip jatyr. Osyǵan deıin pavılon ıeleriniń shamamen úshten biri salyq organdaryna tirkelmegeni anyqtalǵan. Bazar ıelerinen qoldaý bolmaǵandyqtan, tekseris barysynda birqatar qıynshylyqtar kezdesýde. Soǵan oraı reıdtik tekseris 1 aıǵa sozylmaq. Sonymen qatar, bazardyń tabysy men shyǵynyn barlaý úshin arnaıy hronometraj jasalady», - dedi Taraz qalasy ákiminiń orynbasary Saılaýǵaly Baınazarov.
Jıynda Asqar Isabekuly el ishinde aıtylyp júrgen áńgimelerdiń qısynsyzdyǵyn alǵa tartyp, óńirdegi eshqandaı bazar jabylmaıtynyn, ondaǵy saýda jasap kún kórip otyrǵan halyqtyń jaǵdaıy eskerýsiz qalmaıtynyn basa aıtty. Aldaǵy ýaqytta saýda oryndarynyń ıelerimen arnaıy memorondým jasalmaq. Ol qujatta bazardaǵy tazalyq, tártip, tótenshe jaǵdaılardyń aldyn alýǵa arnalǵan saqtyq sharalary men qurylys normalarynyń saqtalýy, ózge de talaptarǵa saı bolýy sekildi kóptegen máseleler qamtylmaq. Bazardyń syrtqy kelbeti, bazar dúńgirshekterindegi taýardyń qarjylaı kólemin naqtylap otyrý sekildi jaıttar da nazarǵa alynady.
Kún tártibindegi másele boıynsha jumys toby qurylyp, jospar bekitiledi. Sondaı-aq, oblys basshysynyń qatysýymen turaqty túrde basqosýlar ótip turatyn boldy.
Ǵıbrat Sembaı