Tarazda erekshe qoǵamdyq forým ótti
«Balasaǵun» ortalyq kontsert zalynda ótken sharaǵa oblys boıynsha ardagerler, zııaly qaýym ókilderi, bıler keńesiniń músheleri, ulttyq mádenı ortalyqtardyń, úkimettik emes uıymdardyń jetekshileri, oqytýshylar men jastar, BAQ ókilderi qatysty.
Qoǵamdyq kelisim men saıası turaqtylyq, etnosaralyq jáne konfessııaaralyq beıbitshilik, birlik pen yntymaq, ulttyq qundylyqtardy jańǵyrtý maqsatyna negizdelgen forýmda qoǵamdaǵy kertartpalyq pen ysyrapshylyqtar jaıy qaýzaldy.
Oblystyq aýmaqtyq kásipodaqtar birlestiginiń tóraǵasy Meırambek Tólepbergen búgingi toılardaǵy, ólim-jitimdegi ysyrapshyldyq pen beı-bereketsizdikti tilge tıek etip, birizdilikke túsirý jaıyn aıtty. Al, Taraz qalalyq máslıhattyń hatshysy Batyrbek Kúlekeev forýmnyń mańyzdylyǵyn atap ótip, osy sharany aýdandarda da jalǵastyrý kerektigine toqtaldy.
«Qazaq halqy birliktiń orny men mańyzyn joǵary baǵalap, «Birlik bolmaı tirlik bolmas», «Birlik túbi – bereke», «Baqyt – birlikte, baılyq – eńbekte» dep túıgen. Sondyqtan da, el tizginin qolyna ustaǵan ardaqty adamdar – handar, bıler, aýzy dýaly aqsaqaldar el ishindegi asqynǵan daý, ýshyqqan janjaldyń jolyna tosqaýyl qoıarda el birligine syna túspeý jaǵyna basa nazar aýdarǵan»,- degen B.Kúlekeev toıdyń jańa baǵytta qalyptastyryp ysyrapshyldyqtan arylý kerektigin jetkizdi.
Sondaı-aq, toıhanalarǵa salyq salý, jastardyń tárbıesine erekshe nazar aýdarý týraly oılarymen bólisti.
Basqosý barysynda ózge de sóz alǵan aqsaqaldar men el aǵalary qoǵamdaǵy túıitkildi máseleler, ulttyq dástúr men ádet-ǵuryptyń ýaqyt aǵymymen ózgerýi, ysyrapshyldyq pen dańǵazalyqqa jol bermeý, jastar tárbıesiniń ózektiligi haqynda aıtyp ótti. Halyqtyń ulttyq bolmysy men biregeıligine keri áser etetin jeń ushynan jalǵasqan jemqorlyq, qyzmettegi jershildik pen tamyr-tanystyq, aǵaıyn arasyndaǵy rýshyldyq, toı toılaýdaǵy ysyrapshyldyq pen astamshyldyq, jastar ortasyndaǵy dańǵoılyq pen kerdeńdik, el ishindegi orynsyz saltanat, qanaǵatsyzdyq pen únemsizdik sııaqty jaman qasıetterden arylý búgingi kúnniń basty talabyna aınalyp otyrǵany sharanyń ózegine aınalyp, másele bop kóterildi.
Forýmdy qorytyndylaǵan aımaq basshysy Asqar Myrzahmetov kóterilgen máseleler toǵysynda oblys turǵyndaryn birlik pen yntymaqqa, sabyrlyq pen qanaǵatshylyqqa, berekeli ómir súrýge shaqyryp, qatysýshylar tarapynan Úndeý joldady.
«Jahandyq álemmen qabyspaıtyn, ulttyń damýyna kedergi keltirip, el ishine iritki salatyn ótkenniń keıbir kertartpa daǵdylary men ádetterinen kúni búginge deıin aryla almaı otyrǵanymyz jasyryn emes. Olar: jeń ushynan jalǵasqan jemqorlyq, jershildik, tamyr-tanystyq, júzshildik pen rýshyldyq, ysyrapshyldyq pen astamshyldyq, dańǵoılyq pen kerdeńdik, orynsyz saltanat, qanaǵatsyzdyq pen únemsizdik. Órkenıetilikke emes ósekke, zııalylyqqa emes zııandyqqa, parasattylyqqa emes pasyqtyqqa, izgilikke emes ibilistikke jeteleıtin mundaı «ǵuryptardan» qutylatyn kezeń keldi. «Іrgeli eldiń irgesin eser aǵym buzar» degendeı, búgingi tańda destrýktıvti dinı aǵymdardyń el arasyna etene enip, jastardyń sanasyn ýlap jatqany da barsha jurtty alańdatyp otyrǵan kúrdeli másele. Bul úrdistiń tamyryna balta shaýyp, ulaǵatty urpaq tárbıeleýde zaıyrly bilimdi ulttyq qundylyqtarymyzben sabaqtastyra otyryp túsindirý – barshamyzdyń basty maqsatymyzǵa aınalýy tıis»,- delingen úndeýde.
Sonymen qatar, buqaralyq aqparat quraldary osy baǵytta nasıhat jumystaryn uıymdastyrý, áleýmettik jelini paıdalanýshylardyń jaýapkershiligin arttyrý úshin arnaıy zań bekitý kerektigi aıtylǵan.