Tarazda eki jańa sport kesheni ashyldy

TARAZ. QazAqparat - «Astananyń 20 jyldyǵyna - 20 nysan» respýblıkalyq aktsııasy aıasynda Jambyl oblysynda eki jańa sport kesheni paıdalanýǵa berildi, dep habarlaıdy QazAqparat oblystyq sport jáne dene tárbıesi basqarmasyna silteme jasap. 

«Oblys ortalyǵynda jańa eki sport kesheni salyndy, ashylý saltanatyna tanymal sportshylar, sport salasynyń ardagerleri, jergilikti bılik ókilderi qatysty. Bul -  №1 Olımpıada rezervin daıyndaıtyn Oblystyq mamandandyrylǵan mekteptiń úshinshi angarlyq zal. Endi 180 oqýshy osy zalda bir aýysymda dzıýdo, erkin jáne grek-rım kúresi, boks, kıkboksıng, ulttyq kúrespen aınalysa alady. Munda úsh jattyǵý zaly tolyǵymen jabdyqtalǵan, sportshylarymyzdyń esh kedergisiz jattyǵýyna barlyq jaǵdaı jasalǵan. Sondaı-aq, №4 oblystyq mamandandyrylǵan balalar-jasóspirimder sport mektebindegi velosıpedterge arnalǵan joldar tolyǵymen jabdyqtalǵan. Jambyldyq veloshabandozdar «Astana» velokomandasynyń quramynda óner kórsetpek. Bul jańa keshendi ashýdaǵy maqsat - oblystaǵy velosportty damytý»  delingen habarlamada. 

Oblystyq mamandandyrylǵan sport mektebiniń negizinde ashylǵan sport kesheniniń baǵasy 494,7 mln teńgeni qurady, al velosıped kesheniniń quny - 166, 5 mln teńge.  Sport kesheninde bir mezgilde 50 bala jattyǵa alady.

Eske sala keteıik, Jambyl oblysynda Elordanyń 20 jyldyǵyna oraı ashylatyn 20 nysannyń qatarynda segiz balabaqsha, tórt sport-saýyqtyrý kesheni, «Burnoye Solar-2» JShS  kún elektr stansasynyń ekinshi kezegi, as tuzyn shyǵaratyn jáne óńdeıtin zaýyt, sút ónimderin shyǵaratyn zaýyttyń tsehi, aýyldyq tarıh mýzeıi, dárigerlik ambýlatorııa, aýylsharýashylyq kooperatıvi, jańa 70 páterli kópqabatty turǵyn úı kiredi.