Tarazda eki jańa móltekaýdan boı kóteredi
«Sizdiń «Bes áleýmettik bastamańyz» aıasynda jańa jobalar qolǵa alyndy. Taraz qalasynda 462 gektar jer bólinip, egjeı-tegjeıli jospar ázirlendi. Ol jerde jańa eki móltekaýdan salynǵaly otyr. Onda 150-den astam kóppáterli turǵyn úı men myńǵa jýyq jeke úı qurylysy júrgiziletin bolady», - dedi Asqar Myrzahmetov.
Jambyl oblysynyń ákimi óz sózinde «7-20-25» baǵdarlamasyn halyqqa túsindirý jáne qatysýshylardy qoldaý úshin arnaıy ortalyq ashylǵanyn, búginde tıimdi jumys atqaryp otyrǵanyn atap ótti. Onyń aıtýynsha, baǵdarlama boıynsha búgingi tańda oblysta 850 mln teńgege 100 adam ótinish berip qoıǵan.
«Oblys boıynsha tabys salyǵyn 1 paıyz jeńildikpen tóleıtin adamdardyń sany 70 myńdy qurady. 5 jataqhana qurylysy bastaldy. Bir jataqhana bos turǵan ǵımarattyń esebinen sheshildi. 6,3 mlrd teńge shaǵyn nesıe berildi. Bul - bólingen qarjy kólemi jóninen respýblıkadaǵy úlken kórsetkishterdiń biri», - dedi Asqar Myrzahmetov.
Eske sala ketsek, Úkimet úıinde QR Prezıdenti Nursultan Nazarbaevtyń tóraǵalyǵymen Úkimettiń keńeıtilgen quramdaǵy otyrysy ótip jatyr. Elbasynyń qatysýymen Úkimettiń mundaı otyrysy jyl basynda turaqty túrde ótkiziledi. Búgingi jıynǵa Úkimet músheleri, Astana, Almaty jáne Shymkent qalalary men oblystardyń ákimderi, ortalyq memlekettik organdar men mınıstrlikter basshylary qatysýda.