Tarazda «Biz birgemiz» monýmenti turǵyzylyp jatyr

TARAZ. QazAqparat – Búginde Taraz qalasynyń sáýleti sát sanap artyp, oblys ortalyǵynda aıtarlyqtaı oń ózgerister oryn alyp jatqanyn jambyldyqtar kórip, bilip, sezinýde. Shahar shyraıyn eselegen jańa nysandar kóptep boı kóterýde, - dep habarlaıdy QazAqparat tilshisi.

Jospardaǵy kóp jobalardyń ishinde «Biz birgemiz» monýmenti de ulttyq naqyshymen kózge túsedi. Búginde qurylys qyzý júrip jatyr. Bul týraly oblys ákiminiń baspasóz qyzmeti málim etti.

Kompozıtsııanyń ortasyndaǵy jer sharyn qol ustasyp turǵan dáriger, áskerı, polıtsııa qyzmetkerleri, órt sóndirýshiler, qutqarýshylar jáne eriktiler sekildi túrli kásiptiń ókilderi qorshap alǵan. Olar qıyn jaǵdaılarda árdaıym birinshi bolyp kómekke kelip, keıde ózgeni qutqarý úshin óz ómirlerin de qurbandyqqa tigip jatady.

«Sáýletshiler birlik pen qoǵamdyq kelisim ıdeıasyn jetkizýge tyrysty. Bizdiń halqymyz koronavırýstyq pandemııa kezinde, Arysta jarylys bolǵan kezde, Túrkistan oblysynyń Maqtaaral aýdanyndaǵy tótenshe jaǵdaı oryn alǵanda da uıymshyldyq pen yntymaqtastyqtyń úlgisin kórsete bildi. Eskertkish keleshek urpaq úshin osy oqıǵalardyń esteligi bolyp qala beredi», - deıdi A.Ábdeshov.

Jer sharynyń artynda turǵan bıik stelanyń dál basynda qarlyǵashtar qorshap turǵan shańyraq ornalasady. Bul qus qasıetti, beıbitshilik pen kelisimniń belgisi bolyp sanalady. Eger ol uıa salsa, qazaqtar ony jaqsylyqqa joryǵan.

Eskertkishtiń eki jaǵynda shaǵyn qurylymdar ornalasady. Olardy ejelgi naqyshtaǵy kúrdeli órnektermen bezendiriledi.

Eskertkish 14-shaǵyn aýdanǵa ornatylady.

Oblys ákimdigi sáýlet jáne qala qurylysy basqarmasynyń basshysy Arman Ábdeshovtiń aıtýynsha, sáýletshilerdiń basty maqsaty – Tarazdy zamanaýı, jaıly qalaǵa aınaldyra otyryp, onyń baı tarıhı murasyn tanytý.

«Ár joba boıynsha jumys isteıtin sáýletshiler, qurylysshylar jáne basqa da mamandar Tarazdy tartymdy, ómir súrýge yńǵaıly jáne jaıly etýge baryn salýda. Jańa nysandar men arhıtektýralyq nysandardyń qurylysy aımaq basshysy Berdibek Saparbaevtyń tóraǵalyǵymen ótken jumys tobynyń otyrystarynda egjeı-tegjeıli talqylanyp otyrady, - deıdi A. Ábdeshov.

Sondaı-aq, búgingi kúni shaharda «Arbat-3» jaıaý júrginshiler aımaǵynyń úshinshi kezeginiń qurylysy júrip jatyr desek, ol da jas urpaqtyń tárbıesinde mańyzdy ról atqarady dep kútilýde. Aımaq «Kóne Taraz» kesheni men Qarahan kesenesin baılanystyrmaq. Arbatta 22 travertındik taqta ornatylyp, olarda ejelgi Taraz tarıhynan mańyzdy datalary qashalyp jazylmaq. Merdigerler kóp uzamaı 320 metrlik sazdy sýburqaqtardyń qurylysyn aıaqtamaq desek, odan bólek onda oryndyqtar, erekshe sándik elementter ornatylatyn bolady.

Aıta ketý kerek, munda jumys keshendi túrde júzege asyrylmaq. Qurylysshylar birden kórshiles ǵımarattardyń qasbetin árleýdi, kóshelerdi jaryqtandyrýdy, aınalany, aıaldamalardy retteýdi qatar júrgiziledi.