Tarazda bıyl múgedekterge arnalǵan monsha ashylady
Qala ákiminiń málimetinshe, óńirde qurylys jumystarynyń kólemi 2025 jyly 80,1 mlrd teńgege artady. Sonymen qatar osy jyly 47 kóppáterli turǵyn úı qurylysy bastalady, jańa 5 mektep paıdalanýǵa beriledi, 7 bilim uıasyna kúrdeli jóndeý júrgiziledi. Sondaı-aq kóptiń kókeıinde júrgen balalar juqpaly aýrýlar aýrýhanasynyń qurylysy bastalady. Shaharda saıabaqtar jańǵyrtylady. Turǵyndardyń demalys ýaqytyn tıimdi paıdalaný úshin «Mamyr» saıabaǵynyń aýmaǵynda ıppoterapııa ortalyǵy salynady. Taǵy bir erekshe jańalyq – elimizde alǵashqy ret múmkindigi shekteýli jandarǵa arnalǵan monsha paıdalanýǵa beriledi.
«Osy toptaǵy azamattar úshin 2023-2024 jyldary 2 áleýmettik beıimdeý ortalyǵynyń qurylysy aıaqtalady. Kelesi jyly salaýatty ómir saltyn nasıhattaýǵa arnalǵan 4 shaǵyn fýtbol alańshasy salynady.
Aldaǵy úsh jylda mádenıet salasynda da keshendi damytý jospary bar. Sonyń biri – Yqylas Dúkenuly atyndaǵy mádenıet úıi kúrdeli jóndeýden ótedi; Asanáli Áshimovtiń shyǵarmashylyq ortalyǵy salynady; «Kóne qamal» kesheniniń úshinshi kezeńi iske asyrylady; al 2024 jyly «Qumshaǵal» turǵyn alqabynda 180 oryndyq qalalyq mádenıet úıi paıdalanýǵa beriledi; Qolóner ortalyǵy ashylady», - dedi qala basshysy.
Qala aýmaǵynyń keńeıýi men halyq sanynyń ósimi artyp keledi. Shahardyń Asqarov, Hamýkat, Qarasaı, Kóktem massıvterine gaz qubyry tartylady. Aldaǵy jyly 116 kósheler men burylystarǵa ortasha jóndeý jumystary júrgiziledi. Oblys ortalyǵyndaǵy Sańyraq batyr jáne Shostakovıch kósheleri qaıta jańǵyrtýdan ótedi.
Sondaı-aq temir jol aımaǵyndaǵy halyqtyń jyldar boıyǵy suranysy – temir jol ústinen ótetin kólik joly qurylysy bastalady.