Tarazda bas qaqpasynda Quran kitaby beınelengen meshit ashyldy (FOTO)
Atalmysh meshitti QMDB-nyń tóraǵasy, Bas múftı Erjan qajy Malǵajyuly men Jambyl oblysynyń ákimi Kárim Kókirekbaev ashty. Dúbirli toıǵa at artyp kelgen dinbasy Alla úıine Quran kitabyn syıǵa tartty, dep habarlanǵan Qazaqstan musylmandary dinı basqarmasynyń saıtynda.
QMDB-nyń Jambyl oblysy boıynsha ókili Danııar qajy Jumabaev Quran baǵyshtap, oblys ákimi jamaǵatqa quttyqtaýyn jetkizdi. Kúnderdiń sultany juma kúni óz esigin aıqara ashqan musylmandyq ordasynda eki rakat nápil namazy oqylyp, keıin ýaǵyz aıtyldy. Sondaı-aq azan shaqyrylyp, juma namazy oqyldy.
Bul meshitke «Keńesken qajy Ahaev» aty berildi. Tóle bı dańǵylyda ornalasqan munarasy kók tiregen meshittiń ımamy bolyp «Haziret Sultan» meshitiniń naıb ımamy Ǵazız Ahmetov taǵaıyndaldy. Ǵımarat áıelder namazhanasymen, dárethanamen qamtamasyz etilgen. Onyń bas qaqpasy qasıetti Quran kitabyn beıneleıdi.
Al onda Paıǵambarymyzǵa (oǵan Allanyń salaýaty men sálemi bolsyn) ýahı etilgen aıattar jazylǵan. Qurylys qabyrǵasynda qazaqtyń ulttyq oıý-órnekteri salynǵan. Meshit syıymdylyǵy - 1000 adam.
Ashylý saltanatyna sonymen qatar Naıb múftı, «Haziret Sultan» meshitiniń bas ımamy Oraz Serikbaı, QMDB-nyń ýaǵyz-nasıhat bóliminiń meńgerýshisi Ershat Ońǵarov, Almaty qalasynyń bas ımamy Nurbek Esmaǵanbet, QMDB-nyń is basqarýshysy Erbosyn Oryn jáne qala ımamdary da qatysty.