Tarazda azyq-túlik baǵasyn turaqtandyrý maqsatynda 3 áleýmettik pavılon ashyldy

TARAZ. QazAqparat – Taraz qalasynda áleýmettik mańyzy bar ónimder baǵasyn turaqtandyrý maqsatynda jyl sońyna deıin áleýmettik pavılondar sanyn 6-dan 17-ge deıin arttyrý josparlanǵan.

Onyń úsheýi Táýelsizdik kúni tutynýshylarǵa esigin aıqara ashty,-dep habarlaıdy QazAqparat tilshisi.

Jambyl oblysynyń ákimi Berdibek Saparbaev jańa ashylǵan pavılondarǵa arnaıy bas suǵyp, tanysty. Kommýnaldyq dúkenderge 16 óndirýshilerdiń ónimi jetkiziledi. Mundaǵy baǵalar naryqtaǵydan 10-20 paıyzǵa tómen. Máselen, turaqtandyrý qorynyń pavılonyndaǵy birinshi surypty unnyń kelisin 143 teńgeden, qant qumyn - 190, kartopty - 95, ósimdik maıynyń lıtri - 420, bir bólke nandy - 55 teńgege satyp alýǵa bolady.

«Biz múmkindiginshe jergilikti sharýa qojalyqtaryn kóptep tartyp, jetkizilim jelisindegi qajet emes býyndardy, ıaǵnı deldaldardy alyp tastaýymyz kerek. Baǵany turaqtandyrýdyn negizgi ádisi – osy. Dúkender barlyq turǵyndarǵa, eń aldymen, halyqtyń áleýmettik osal tobyndaǵy adamdarǵa qol jetimdi bolý úshin qalanyń barlyq bóliginde ornalasýy tıis», - dep oblys ákimi «Taraz-ÁKK» UK» AQ men aýylsharýashylyq basqarmasyna tıisti tapsyrma júktedi.

Turǵyndardyń shaǵymdary týyndamas úshin, ár dúkende taýarlardyń baǵasy men jaýapty mamandardyń nómirleri jazylǵan stendter ornatylǵan.

«Kóp nárse satýshylarǵa baılanysty. Olar mádenıetti bolyp, ár tutynýshyǵa kómektesýi kerek. Turǵyndar kommýnaldyq dúkenderdiń barlyq artyqshylyqtary týraly bilýi tıis», - dedi Berdibek Saparbaev.

Aımaq basshysy taýarlardyń baǵasyn tekserip, satýshylardy jáne alýshylardy áńgimege tartty. Turǵyndar baǵany turaqtandyrý boıynsha qabyldanǵan sharalar úshin oblys basshylyǵyna rızashylyqtaryn bildirdi.

«Tıimdi baǵada azyq-túlik satyp alǵanyma qýanyshtymyn. Endi merekelik dastarhandy ázirleý úshin úıge asyǵýdamyn», - deıdi kópbalaly ana Aınagúl Espenbetova.

Aıta ketý kerek, oblystyń barlyq aýdandarynda qosymsha 10 áleýmettik pavılon ashylýda.