Tarazda áskerı bólimnen qashyp ketken sarbazdy 4 kúnnen beri izdestirip jatyr

TARAZ. QazAqparat - Tarazda merzimdi qyzmettegi sarbaz áskerı bólimnen qashyp ketti. Túngi kezekshilik kezinde joǵalyp ketken 19 jastaǵy jigitti 4 kúnnen beri izdep jatyr, dep habarlaıdy QazAqpara Habar 24 saıtyna silteme jasap.

Áskerılerdiń aıtýynsha, Nurasyl Arysbaev túngi saǵat úsh shamasynda áskerı bólimnen eshkimge eskertpesten óz erkimen ketip qalǵan. Janyndaǵy serigi de baıqamaǵan. Sarbaz áli 6 aı áskerı boryshyn óteýi kerek. Nurasyldyń ketip qalǵanyna áskerıler tańǵalyp otyr. Sebebi, ol basqalarmen qarym-qatynasy jaqsy, sabyrly jigit. Jaýaptylar onyń qolynda qarý joq ekenin málimdedi. Al, sarbazdyń týystary onyń qashyp ketkenine senbeıdi.

«Sońǵy ret 20-synda zvondady, «bári jaqsy mama, ýaıymdamańyz»-dedi. Eshkim renjitip jatqan joq pa, dep suradym. «Joq, bári jaqsy, ýaıymdamańyz, balalar da jaqsy, komandırler de jaqsy», dedi»,-deıdi sarbazdyń anasy Gúljan Arysbaeva.

«Ne sebepten qashyp ketkeni bizge beımálim. Búgingi tańda Jambyl oblysy boıynsha jáne Taraz qalasynda osy áskerı bólimniń qyzmetkerleri jáne quqyq qorǵaý organdary tarapynan Taraz qalasy polıtsııa basqarmasynyń qyzmetkerleri izdestirý sharalaryn júrgizipjatyr. Ázirge nátıje joq»,-deıdi 8595 áskerı bólimi komandıriniń tárbıe jáne ıdeologııalyq jumystar jónindegi orynbasary Baýyrjan Dúısenbaev.