Tarazda áriptesterimen pyshaqtasqan eks-polıtseı óz erkimen berilgen - Bas prokýratýra

ASTANA. QazAqparat - Áriptesterimen pyshaqtasqan Jambyl oblystyq ishki ister departamentiniń buryńǵy basqarma basshysy Úmbetálıev polıtsııaǵa óz erkimen berilgen. Búgin QR Bas prokýratýrasy Úmbetálıevti polıtsııa qyzmetkerleri ustaǵandyǵy týraly Іshki ister mınıstrliginiń aqparatyn teriske shyǵardy, dep habarlaıdy QazAqparat.

«Bas prokýratýranyń jedel tergeý toby aǵymdaǵy jyldyń 9 tamyzynan 10-na qaraǵan túni Taraz qalasy «Araı Plaza» bıznes ortalyǵy janynda Jambyl oblystyq ІІD Ekstremızge qarsy basqarmasynyń bastyǵy M.I.Úmbetálıev, Krımınaldyq polıtsııa basqarmasynyń bastyǵy E.O. Bekturǵanov jáne aýdandyq HQKO basshysy M.J. Jetpisbaevtyń arasynda oryn alǵan oqıǵaǵa qatysty tergeý jumystaryn júrgizýde.

19 tamyz saǵat 13:00-de Úmbetálıev Shý aýdandyq prokýratýrasyna óz erkimen kelgen, odan keıin ol Taraz QІІB Ýaqytsha ustaý ızolıatoryna jetkizildi jáne qazirgi ýaqytta sol jerde otyr», - dep jazdy QR Bas prokýratýrasy Feısbýktegi resmı paraqshasynda.

Málim etilgendeı, buǵan Bas prokýratýranyń kúdiktiniń qorǵaýshylary men jaqyn týystary arasynda ótkizgen túsindirme jumystary sep bolǵan.

«Osylaısha, ІІM-niń Úmbetálıevti polıtsııa qyzmetkerleri ustady degen aqparaty shyndyqqa janaspaıdy. Kúdiktiniń áreketi «eki nemese odan kóp adamdy buzaqylyq nıetpen óltirýge oqtalý» dep saralanyp, oǵan «kúzetpen ustaý» túrindegi bultartpaý sharasy qoldanyldy», - dep naqtylady Bas prokýratýradan.

Eske salaıyq, 10 tamyz kúni keshkisin burynǵy polıtsııa qyzmetkeri M.Jetpisbaev, Jambyl oblystyq ІІD basqarmalarynyń basshylary M.Úmbetálıev pen E.Bekturǵanov birge spırttik ishimdik ishkennen keıin, aralarynda janjal týyndap, sońy tóbeleske ulasty. Úmbetálıev M.Jetpisbaevqa pyshaq suǵyp, E.Bekturǵanovqa jaraqat salǵan.

11 tamyz kúni belgili bolǵandaı, mas kúıinde janjal shyǵarǵan Jambyl oblystyq ІІD basqarma basshylaryishki ister organdarynan shyǵaryldy .