Tarazda alkogoldi ishimdik jasaıtyn jasyryn tseh áshkere boldy

TARAZ. QazAqparat - Taraz qalasynda jeke menshik úıdiń turǵyndary jalǵan alkogol ónimderin daıyndap kelgen, dep habarlaıdy QazAqparat Qarjy monıtorıngi komıtetine silteme jasap.

Jambyl oblysy boıynsha ekonomıkalyq tergeý departamentine Taraz qalasynyń birneshe turǵynynyń jeke menshik úıde aktsızdeletin taýarlardy tańbalaý tártibi men erejesin buzyp, zańsyz alkogol ónimin daıyndap, satýmen aınalysatyny jóninde aqparat kelip tústi.

«Departament qyzmetkerleri júrgizgen jedel sharalar barysynda zańsyz alkogol ónimderin daıyndaıtyn jasyryn tseh joıyldy. Tintý kezinde quramynda spırti bar 750 lıtr suıyqtyq, 12 500 esepke alý-baqylaý markasy, 11 840 alkogol óniminiń zattańbasy, zańsyz ónim daıyndaýǵa arnalǵan ártúrli jabdyqtar (ydystar, qaqpaqtar qaptamasyna arnalǵan jaıma kilti), 1000 bótelkeden astam daıyn alkogol ónimi tárkilendi» delingen habarlamada.

Qazirgi ýaqytta aıǵaqtardy jınaqtaý jáne bekitý boıynsha tergeý sharalary júrgizilip jatyr.