Tarazda alǵashqy endokrınologııalyq ortalyq ashyldy
Ortalyqtyń saltanatty ashylýna tanymal endokrınolog Laýra Danııarova jáne oblystyq densaýlyq saqtaý basqarmasynyń basshysy Áset Qalıev qatysty.
Dúnıejúzilik densaýlyq saqtaý uıymynyń derekterine sáıkes, qazirgi ýaqytta álemde qant dıabetimen aýyratyn patsıentterdiń sany - 415 mıllıon adamdy quraıdy. 2040 jylǵa qaraı olardyń sany - 642 mıllıon adamǵa deıin artýy múmkin degen boljam bar.
«Jambyl oblysy boıynsha aǵymdaǵy jyldyń qazan aıyndaǵy málimetterge sáıkes dıspanserlik esepte dıabetpen aýyratyn 19250 turǵyn bar, onyń ishinde 18000 den astamy (95%) - 2 tıpti qant dıabeti bar patsıentter. Sońǵy 5 jyl ishinde onymen aýyratyn azamattardyń sany jyl saıyn - 6-8 paıyzǵa artyp keledi. Jylyna orta eseppen 500 naýqastyń ólimine dıabet aýrýy sebep bolýda»,-delingen oblystyq densaýlyq saqtaý basqarmasynyń habarlamasynda.
Oblysta alǵash ret endokrınologııalyq ortalyqtyń ashylýy –aýrýdyń aldyn-alýǵa halyqty shaqyrý, emdelýshilerge keńester berý, derttiń keıingi jáne keri áserleri týraly eldi aqparattandyrý, «Dıabet mektebiniń» yqpalyn keńeıtý maqsatyna negizdelgen.
«Ortalyq barlyq aspaptyq tekserýlermen jáne zerthanalyq qyzmetterdiń barlyq spektrimen jabdyqtalǵan. Munda fızıoprotsedýralar men medıtsınalyq ońaltýdy qosa otyryp, kúndizgi jáne táýliktik statsıonar jaǵdaılarynda emdelýge, bıopsııany dıagnostıkalaýdyń ınvazıvti ádisterin júrgizip, sút, qalqansha bezine, erlerdiń jynys múshelerine jáne basqalarǵa hırýrgııalyq aralasýlar jasaýǵa da múmkinshilikter bar. Halyqqa endokrınologııalyq-konsýltatsııalyq kómek kórsetý baǵytynda qyzmet etetin ortalyqta bilikti de bilimdi mamandar eńbek etedi»,-deıdi oblystyq densaýlyq saqtaý basqarmasynyń basshysy Áset Qalıev.
Aıta keteıik, ortalyq ashylýmen qatar osy kúni «Almaz Medical Group» JShS Jambyl fılıaly bazasynda oblys endokrınologtarynyń konferentsııasy da ótkizildi. Konferentsııada «Qant dıabetin emdeýdegi ınnovatsııalyq ınsýlınoterapııa», «Covid-19 pandemııasy jaǵdaıyndaǵy qant dıabeti» jáne «Jambyl oblysynyń endokrınologııalyq qyzmeti» taqyrybynda máseleler talqylandy.