Tarazda áleýmettik kólik kartasy iske qosyldy
Tarazda búginde jolaqysyn tóleýdiń birneshe joly bar. Qoǵamdyq kólik jolaýshylary QR kod nemese avtobýstyń sandyq kody, «TulparCard» kólik kartasy nemese SMS-habarlama jáne mobıldi qosymsha arqyly jolaqy tóleı alady. Bıyl aqpan aıynan bastap «tulparcard» jol aqysyn tóleýdiń elektrondy júıesi tólemniń taǵy bir jańa túrin – Kaspi QR engizgen bolatyn.
«Elimizdiń «Avtomobıl kóligi týraly» Zańyna 2022 jyldyń 29 jeltoqsanynda engizilgen ózgeristerge baılanysty bıyl 1 naýryzdan bastap 15-ten 18 jasqa deıingi jastarǵa qoǵamdyq kólikte 50 paıyzdyq jeńildikpen júrý jáne «Altyn alqa», «Kúmis alqa» alqalarymen nagradtalǵan nemese buryn «Batyr ana» ataǵyn alǵan, sondaı-aq I, II dárejeli «Ana dańqy» ordenderimen nagradtalǵan kópbalaly analarǵa, birinshi toptaǵy múgedektigi bar adamdarǵa tegin jol júrý quqyǵy berilip otyr.
Osyǵan baılanysty «Tulparcard» jolaqysyn tóleýdiń elektrondyq júıesinde qoǵamdyq kólikte tegin júrýge múmkindik beretin kólik kartasynyń jańa túri – «Áleýmettik kólik kartasy» iske qosyldy, – dedi Jambyl oblystyq tsıfrlyq tehnologııalar basqarmasynyń basshysy Rýslan Noqrabekov.
Aıta keteıik, qazirgi tańda oblysta 291 810 kólik kartasy shyǵaryldy. Onyń ishinde 224 533 – biryńǵaı kartalar, 66 223 – oqýshylar kartasy. Al, І top múgedektigi bar adamdarǵa arnalǵan áleýmettik karta – 105, nagradtalǵan kópbalaly analarǵa arnalǵan áleýmettik karta sany – 949.
Buǵan deıin Jambyl oblysynda 4 aıda 305 jol apaty bolǵanyn habarlaǵan bolatynbyz.