Tarazda ákimdik ǵımaratyna shabýyl jasaǵandar esirtkiniń áserinde bolǵan - prokýratýra

NUR-SULTAN. QazAqparat – Tarazda ákimdik pen departament ǵımaratyna shabýyl jasaǵan 11 adam kóz jumdy. Bul týraly QR Bas prokýratýrasy 1-qyzmet bastyǵynyń orynbasary Eldos Qılymjanov aıtty, dep habarlaıdy QazAqparat tilshisi.

«Bıylǵy 6 qańtarda Taraz qalasy ákimdiginiń jáne Jambyl oblysy Memlekettik kirister departamentiniń ǵımarattaryna qarýly shabýyl jasaldy. 500-ge jýyq adamnan quralǵan toptyń arasyndaǵy qarýly adamdar atalǵan ǵımarattarǵa oq atty. Sonyń saldarynan polıtsııa qyzmetkeri qaza boldy. Osyǵan baılanysty quqyq qorǵaý organdary qarsy oq atyp, 11 qylmyskerdiń kózi joıyldy», - dedi E. Qılymjanov Ortalyq kommýnıkatsııalar qyzmetinde.

Onyń aıtýynsha, medıtsınalyq zertteýlerdiń nátıjeleri boıynsha shabýyl jasaǵan 9 adam mas kúıinde jáne ekeýi esirtkiniń áserinde bolǵan.

Budan buryn habarlanǵandaı, qańtar oqıǵasyna qatysty sot sanktsııalarymen 627 kúdikti adam qamaýda otyr.

Sonymen qatar Taldyqorǵanda memlekettik nysandardy basyp alý qatysýshylaryn qarjylandyrǵandar anyqtaldy.