Tarazda «7-20-25» baǵdarlamasyn túsindiretin ofıs ashyldy

TARAZ. QazAqparat - Taraz qalasynda «7-20-25» ıpotekalyq baǵdarlamasyn júzege asyrý maqsatynda arnaıy ortalyqtandyrylǵan túsindirý ofısi ashyldy,  dep habarlaıdy QazAqparat. 

Taraz qalasyndaǵy Qolbasshy Qoıgeldi kóshesi № 173 úıde ornalasqan ofıste baǵdarlamaǵa qatysýshy barlyq ekinshi deńgeıdegi bank ókilderi shoǵyrlanǵan. Endi ol qala turǵyndaryn málimettik keńester, jeńildikter týraly habardar etip, sol arqyly ıpotekalyq baǵdarlamany qarqyndy júzege asyrý úshin júıeli jumystar júrgizilmek. Sonymen qatar, onda baǵdarlama boıynsha «Araı» turǵyn alqaby, Súleımenov kóshesiniń sońyndaǵy 15- shaǵyn aýdandaǵy úılerden páter alýǵa turǵyndardan ótinishter qabyldanady. Seriktes ekinshi deńgeıli bankterdiń qujattardy rásimdeý, páterdiń  aýdany men bólmesi, baǵasy týraly tolyq aqparatty da alýǵa bolady.

Aıta keteıik, búginde oblys ortalyǵynda turǵyn úı kezeginde turǵan 16500 adamnyń ishinen 300 adam baǵdarlamaǵa qatysýǵa nıet bildirgen.   Nıet bildirýshilerge  «Araı -2» alqabynan  101 páter jáne «Báıterek development» AQ turǵyzǵan 34 páter ekinshi deńgeıli bankter arqyly usynylýda. Odan bólek, jaqyn arada jańa 15-shaǵyn aýdandaǵy 800 páterdiń 559-i «7-20-25» baǵdarlamasy arqyly usynyla bastaıdy dep kútilýde.

Ǵıbrat Sembaı