Tarazda 1200 stýdent pen oqytýshy «Abaı joly» romany boıynsha dıktant jazdy

TARAZ. QazAqparat – M. H. Dýlatı atyndaǵy Taraz óńirlik ýnıversıteti men Jambyl oblysy ákimdigi tilderdi damytý basqarmasynyń uıymdastyrýymen Abaıdyń 175 jyldyq mereıtoıyna oraı «Abaı joly» roman epopeıasy boıynsha ýnıversıtet oqytýshylary men qyzmetkerleri jáne stýdentteri jappaı dıktant jazdy, dep habarlaıdy QazAqparat tilshisi.

Shara Zoom platformasynda uıymdastyryldy.

Jumystardy arnaıy «Qazaq tili jáne orys tili», «Qazaq tili men ádebıeti», «Orys fılologııa», «Fılologııa jáne jýrnalıstıka» kafedralarynyń oqytýshylarynan qurylǵan komıssııa músheleri tekserdi.

«Abaı joly» roman-epopeıasy boıynsha jappaı dıktant jazý baıqaýynyń ashylýynda onlaın baılanys arqyly QR Ǵalymdar odaǵynyń prezıdenti, ekonomıka ǵylymdarynyń doktory, professor Orazaly Sábden sóz sóıledi.

Ol óz sózinde Abaı iliminiń ózektiligin qozǵady. Tolyq adam ilimin meńgerip, ár jan tolyq adam bolýǵa umtylýy kerektigin aıtty.

Abaı shyǵarmashylyǵyn nasıhattap, professor-oqytýshylar quramy men bilim alýshylardyń uly aqynnyń rýhanı muralaryna degen qyzyǵýshylyqty arttyrýdy maqsat etken shara barysynda jalpy 1200 dıktant jazylǵan.

Eń saýatty jazylǵan jumystar baǵaly syılyqtarmen, arnaıy alǵys hatpen marapattaldy.