Tarazda 1,5 mlrd teńgege jaǵalaýdaǵy demalys orny ashylmaq

TARAZ. QazAqparat – Taraz qalasyndaǵy «Zerbulaq» kóliniń jaǵalaýynda joǵary deńgeıli demelys orny ashylatyn bolady. Oblys ákimi Berdibek Saparbaev kólge arnaıy baryp, josparly jobalarmen tanysyp, nysannyń irgestasyn qalaý sharasyna qatysty, dep habarlaıdy QazAqparat tilshisi.

Qala ortalyǵynda ornalasqan kól Keńes kezeninde «Komsomol» atymen tanylyp, jambyldyqtardyń súıikti demalys ornyndarynyń biri bolatyn. Alaıda ýaqyt óte kóldiń tozyǵy jetip, qaraýsyz qalǵany jasyryn emes.

Bas merdiger «South holiday» JShS 1,5 mıllıard teńge salyp, dál sol aýmaqtan jaıly jáne ár túrli baǵyttaǵy demalys aımaǵyn ashpaq. Joba áleýmettik baǵytta iske asady, tek meıramhana men úsh basseın ornalasqan nysanǵa ǵana aqyly túrde kirý qarastyrylmaq. Jalpy, keshen tórt aımaqtan turady. Onda kóldiń óziniń tamasha jaǵajaıy jáne qaıyqtar men katamarandardy jalǵa berýge arnalǵan oryn, tamasha kórinis beretin pırspen qamtylǵan ortalyq alleıa jáne jaqyn jerde ornalasqan sport alańshalary, arnaıy balyq aýlaý aımaǵy da qarastyrylǵan.

Sondaı-aq balalar alańdary, qarttar úshin demalys oryndary ashylyp, sákiler ornalastyrylady.

Joba 2023 jyldyń ekinshi toqsanynda tolyq aıaqtalady dep kútilýde. Merdiger birinshi kezeńde kóldi tazartýmen aınalysady, onyń túbin arnaıy geomembranamen qaptap, tas tósemek. Jaǵajaıǵa taza qum ákelinip, sýburqaqtar ornatylady. Sondaı-aq, ortalyq alleıa tolyq abattandyrylyp, túrli baǵaly aǵash kóshetteri otyrǵyzylady.

«Jumys kestesin jasańyzdar, onyń oryndalýyn Taraz qalasy ákimdigi baqylaıtyn bolady. Qurylys jumystaryn júrgizý barysynda tabıǵatqa zııan kelmeýine asa kóńil bólý qajet», - dedi Berdibek Saparbaev.