Taraz ýnıversıtetiniń ekspedıtsııasy kıeli oryndardy aralaýǵa attandy

TARAZ. QazAqparat - Muhammed Haıdar Dýlatı atyndaǵy Taraz memlekettik ýnıversıtetiniń oqytýshylary men stýdentteri Jambyl oblysy boıynsha «Áýlıe ata - kıeli meken» atty ekspedıtsııaǵa shyqty, dep habarlaıdy «QazAqparat» HAA tilshisi bilim ordasynyń baspasóz qyzmetine silteme jasap.

«Týǵan jer» baǵdarlamasy aıasynda uıymdastyrylǵan ekspedıtsııanyń josparynda - jergilikti geografııany, arheologııany, sondaı-aq Jambyl oblysyndaǵy ulystardyń tarıhyn zertteý, Qarahan men Aısha bıbi, Tekturmas pen Aqyrtas keseneleri  syndy kıeli oryndarda bolý.

«Bul - sońǵy jyldardaǵy ekinshi iri ekspedıtsııamyz, - dedi TarMÝ rektory Mahmetqalı Sarybekov. - 2015 jyly Qazaq handyǵynyń 550 jyldyǵyna oraı bizdiń ýnıversıtetimiz «Uly halyq jolymen» ekspedıtsııasyn uıymdastyrdy, onyń nátıjesi boıynsha Qazaq handyǵynyń negizin qalaýshylar - Kereı men Jánibek handardyń Shý ózeniniń saǵasymen júrip ótken jolynyń kartasy jasaldy.

TarMÝ Gýmanıtarlyq-áleýmettik ǵylymdar fakýlteti «Qazaqstan tarıhy» kafedrasynyń ókilderi «Áýlıe ata - kıeli meken» eki aptalyq ekspedıtsııasy kezinde úsh baǵyt boıynsha júrip ótip, Jýaly, Jambyl, Talas, Sarysý, Baızaq, Shý, Moıyńqum, Rysqulov, Merki jáne Qordaı aýdandarynda bolady.