Taraz soty jemqorlyq belgileri boıynsha kósh bastap tur - saýalnama nátıjesi

ALMATY. 23 shilde. QazAqparat - Búgin Almatyda  «Transparensı Qazaqstan» qoǵamdyq qory «Sot pen onyń barlyq deńgeıindegi qyzmetiniń jarııalylyq deńgeıin baǵalaý jáne halyqtyń kózqarasyn anyqtaý» taqyrybymen  ótken zertteý nátıjelerin jarııalady.

Qordyń atqarýshy dırektory Sergeı Zlotnıkovtyń aıtýynsha, ol Nıderlandy Úkimetiniń qoldaýymen «Qazaqstandaǵy sottardyń jarııalylyǵy men táýelsizdigin qamtamasyz etý barysynda qoǵamdyq qatysý» jobasy aıasynda júrgizilgen. Ol 25 sáýir men  25 mamyr aralyǵynda qalalyq sotqa kelýshiler men  qarapaıym halyqtyń arasynda eki kezeńmen júrgizildi. Onda Aqtóbe, Almaty, Astana, Qaraǵandy, Pavlodar, Taraz, Óskemen jáne Shymkent qalalarynda  barlyǵy 800 adam suralyndy.  

«Saýalnama qorytyndylaryna qaraǵanda sotqa kelýshilerdiń 49 paıyzy - ortasha, 35 paıyzy - jaqsy, 6 paıyzy óte jaqsy dep baǵa berdi. Respondentterdiń kóńilinen shyqqan sot jumysynyń aspektileri: sot tóreshisiniń sot protsesi barysyndaǵy ózin-ózi ustaı bilýi jáne sot isindegi protsessýaldy normalardyń saqtalýy. Al sot isiniń qaralý ýaqyty men sheshim shyǵarýdaǵy zańdy saqtaý boıynsha sotqa kelýshiler kóbinese narazylyq bildirgen», - deıdi sarapshy Gúlnara Ileýova.

Onyń sózine qaraǵanda, sotqa degen senimin bildirýde kelýshilerdiń 15 paıyzy tolyq senemin dese, 63 paıyzy senýge jaqyn. Sondaı-aq sottaǵy jemqorlyqtyń deńgeıin sotqa kelýshiler orta mólshermen 4,7 balǵa teńep otyr. Jemqorlyqtyń eń joǵary kórsetkishi Taraz (6,6 ball) ben Almaty (6,4 ball) qalalarynda tirkelip otyr. Eń tómengi kórsetkish Aqtóbe (3,7 ball) men Óskemen qalalarynda (3,5 ball) anyqtaldy. Sottaǵy jemqorlyqtyń sebebin respondentterdiń bir bóligi  adamdardyń ózderiniń sotty ózine tıimdi etip formaldy emes túrde sheshýge umtylýymen baılanystyrsa, al taǵy bir bóligi halyqtyń dili men qalyptasqan dástúrge silteıdi.  Saýalnamaǵa qatysqan sotqa kelýshilerdiń 59 paıyzy  sot pen sot tóreshileriniń jumysyna kóńili tolatynyn,  20 paıyzy  kóńili tolmaıtynyn,  21 paıyzy jaýap berýge qınalatynyn bildirip otyr. Aqtóbe, Pavlodar, Astana jáne Óskemen sottarynyń isine oń kózqaras basym bolsa, Qaraǵandy qalasynda ortasha, al Almaty men Taraz qalalarynda tómen baǵa kóbirek berilgen. Sotqa kelýsherdiń 52 paıyzy  úshin sot pen sot tóreshileriniń jumysy týraly aqparat qoljetimdi emes.