Taraz káriz sýy tazalanbaıtyn jalǵyz qala - depýtattar aýyz sý sapasyna alańdaýly

NUR-SULTAN. QazAqparat –Tarazda káriz sýyn tazalaý qondyrǵysynyń bolmaýynan kórshiles aýyldardyń aýyz sýy bylǵanyp otyr. Bul másele Parlament Májilisinde kóterildi, dep habarlaıdy QazAqparat tilshisi.

«Qazaqstan óńirleriniń birdeı deńgeıde damýy Memleket basshysy atap kórsetkenindeı, áleýmettik ádildik turǵysynan óte mańyzdy. Bul jaǵdaı «Halyq únine qulaq asatyn memleket» tujyrymdamasyn tıimdi júzege asyrýda da basty nazarda bolýy tıis. Osy oraıda Jambyl óńirinde kópten beri aıtylsa da oryndalýy uzaqqa sozylǵan úlken áleýmettik-ekologııalyq ótkir másele bar. Qazir Taraz qalasy káriz sýyn tazalaý qondyrǵysy joq elimizdegi jalǵyz qala bolyp otyr. Qalanyń qaldyq sýy irgeles Jambyl aýdanyndaǵy Qostóbe aýylynyń mańynda ornalasqan 197 gektar bolatyn súzgi alqabyna tógiledi», - dedi depýtat Meırambek Tólepbergen Májilistiń jalpy otyrysynda.

Onyń aıtýynsha, qazir 360 myńnan astam halyq turatyn qaladan alqapqa káriz júıeleri arqyly keletin qaldyq sý kólemi jobalyq qýattan 1,5 ese kóp túsedi. Sondyqtan bul sýlar basqa oblystyń aýmaǵyna taralyp, qorshaǵan ortany zııandy qaldyqtarmen jáne ıispen lastap otyr.

«Zerthanalyq zertteý nátıjesinde káriz sýlaryndaǵy qatty zattar mólsheriniń ruqsat etilgen normadan 60 esege deıin asqany anyqtalǵan. Shaıyndy jáne sarqyn sý tógiletin aýmaqtaǵy bes eldi meken paıdalanyp otyrǵan sý sapasy eshbir sanıtarlyq normaǵa saı kelmeıdi, tehnogendik apat aýmaǵyna aınalatyn jaǵdaıda tur», - dedi spıker.

Qazirgi ýaqytta qalalyq káriz sýyn tazalaý keshenin salý jobasynyń tehnıkalyq-ekonomıkalyq negizdemesi daıyndalyp, «Memlekettik saraptama» RMK qaraýyna usynylǵanymen, qabyldanǵan moratorııǵa sáıkes joba toqtap tur.

«Jergilikti atqarý organdary kóp jyldan beri qanshama utymdy usynystar, is-áreketter men talpynys jasady. Biraq olar túrli sebeptermen túpki nátıjege qol jetkize almaı keledi. Osynyń saldarynan jyldar boıy qordalanǵan ahýal áleýmettik ótkir ári ashyq máselege aınala bastady. Endeshe «elge esep beretin Úkimet» tarapynan bul iske erekshe mán berip, naqty qoldaý jasaý qajettigi týyndap otyrǵanyn aıtýǵa tıispiz. Joǵaryda aıtylǵandardy eskere otyryp, eldimekenderde adam ómiri men densaýlyǵyna qolaıly qorshaǵan ortany qamtamasyz etý maqsatynda:

1) Taraz qalasyndaǵy shaıyndy sýlar júıesiniń qazirgi qıyn jaǵdaıyna qatysty qajetti sharalardy júıeli túrde engizýdi;

2) Taraz qalasyndaǵy káriz sýdy tazalaý keshenin salý jobasyna qoldaý kórsetip, respýblıkalyq bıýdjetten qarjylandyrý máselesin qarastyrýdy suraımyz», - degen depýtattar QR Premer-Mınıstriniń birinshi orynbasary Roman Sklıarǵa saýal joldady.