Taraz qalasy eki aýmaqqa bólinedi

TARAZ. QazAqparat – Taraz qalasy aldaǵy ýaqytta ońtústik jáne soltústik aýmaq bolyp ekige bólinedi dep josparlanýda. Bul týraly Jambyl oblysynyń əkimi Nurjan Nurjigitov Tarazdyń 11-okrýg turǵyndarymen kezdesýinde aıtty, dep habarlaıdy QazAqparat tilshisi.

Aıta keteıik, oblys ákimi buǵan deıin de Taraz qalasynyń aýmaǵyn keńeıtip, ákimshilik aýdandarǵa bólý máselesi boıynsha keńes ótkizgen bolatyn.

Bas josparǵa túzetýler engizilgen soń aýyldyń 44 551 halqy qala turǵynyna aınalady. Taraz halqynyń sany 408 235 bolyp, qala aýmaǵy 11 755 gektarǵa ulǵaıady. Solaı jalpy aýdany 30 542 gektardy quraıdy.

«Joba júzege asqanda Tarazda sáıkesinshe, bir qala ákimi, eki aýdan ákimi bolady. Sonda kóne shahardaǵy áleýmettik máselelerdi sheshý de jeńildeı túsedi. Bizdiń bul bastamamyzǵa Prezıdent Qasym-Jomart Toqaev qoldaý bildirdi», - dedi jurtshylyqpen júzdesýde oblys ákimi Nurjan Nurjigitov.

Aıta keteıik, qala mańynda ornalasqan 11-okrýgtiń qazirgi tańda 25 myń turǵyny bar. Keler jyly munda úsh birdeı mekteptiń qurylysyn bastaý josparlanyp otyr.

Turǵyndar kezdesýde: «Emhanamyz eski, maman az. Sol sebepti bizge jańa emhana soǵyp berseńiz», - degen ótinish te aıtty. Nurjan Nurjigitov bul másele aldaǵy ýaqytta qarastyrylatynyn jetkizdi.
Buǵan deıin Taraz qalasynyń aýmaǵyn keńeıtip, ákimshilik aýdandarǵa bólý máselesi qarastyrylyp jatqanyn jazǵan bolatynbyz.