Taratylatyn segiz banktegi depozıtter 31 mamyrǵa deıin BJZQ-ǵa aýdarylady
Baspasóz qyzmetiniń málimetterine qaraǵanda, qazaqstandyqtar áli kúnge deıin ózderiniń 2,3 mlrd teńge jınaq aqshalaryn talap etýge asyǵar emes. Búginde bul qarajatty úıden shyqpaı-aq, onlaın túrinde nemese agent bankterdiń bólimshelerine baryp alýǵa bolady.
Qazaqstannyń depozıtterge kepildik berý qorynyń (Qor) basshylyǵy lıtsenzııasynan aıyrylǵan bankterdegi salymdar boıynsha kepildik berilgen ótemdi qalaı jáne qaı merzimge deıin alýǵa bolatyndyǵyn aıtyp berdi.
Qor Tóraǵasy Ádil Ótembaev qazirgi ýaqytta elimizde 9 bankte taratý úderisi júrgizilip jatqandyǵyn, olardyń salymshylaryna ótem somasynyń 98%-dan astamy tólenip qoıylǵandyǵyn, al munyń 113,1 mlrd astam teńge bolatyndyǵyn jetkizdi.
«Taratylatyn segiz bankten tólemderdi sońǵy kúnin qosa alǵanda bıylǵy jyldyń 1 mamyryna deıin alýǵa bolady. Al «Capital Bank Kazakhstan» AQ basqa bankterge qaraǵanda lıtsenzııasynan keıinirek aıyrylǵandyqtan onyń salymshylary úshin sońǵy tólem kúni – sońǵy kúnin qosa alǵanda 2022 jyldyń 3 shildesi», - dedi Ádil Ótembaev.
Kepildik berilgen ótemdi alýǵa ótinishti Tólemderdiń elektrondyq portaly (TEP) arqyly onlaın túrinde berýge bolady. Munda ótinishtiń oryndalý barysyn qadaǵalaýǵa múmkindik bar. Salymshylar taratylatyn árbir bank boıynsha ótem tóleýge taǵaıyndalǵan agent bankterdiń bólimshelerine jazbasha ótinishpen júgine alady.
Tólem merzimi aıaqtalǵan soń, «Qazınvestbank» AQ, «Delta Bank» AQ, «Qazaq Banki», «Eksımbank Qazaqctan» AQ, «Astana Banki» AQ, «Tengri Bank» AQ, «AsiaCredit Bank (AzııaKredıt Bank)» AQ jáne «Capital Bank Kazakhstan» AQ salymshylarynyń talap etpegen ótem somalary olardyń erikti zeınetaqy jarnalaryn (EZJ) esepke alýǵa arnalǵan jeke zeınetaqy shottaryna aýdarylady.
Qor aýdarymdy «Qazaqstan Respýblıkasynyń ekinshi deńgeıdegi bankterinde ornalastyrylǵan depozıtterge mindetti kepildik berý týraly» QR Zańyna sáıkes tólem merzimi aıaqtalǵan kúnnen bastap, kúntizbelik 30 kún ishinde júzege asyrady. Demek taratylatyn segiz banktiń salymshylarynyń aqshalary BJZQ-ǵa 31 mamyrǵa deıin, al «Capital Bank Kazakhstan» AQ boıynsha aǵymdaǵy jyldyń 2 tamyzyna deıin aýdarylady.
BJZQ mamandary óz kezeginde aqshany jeke zeınetaqy shotyna aýdarý úshin salymshynyń zeınetaqy qoryna barýy mindetti emestigin jetkizdi.
Salymshy týraly málimet BJZQ-nyń aqparattyq resýrsyndaǵy derektermen sáıkes kelip, onyń qoldanystaǵy jeke kýáligi bar bolǵan jaǵdaıda kepildik somasy aýdarylady. Budan basqa salymshynyń zeınetaqy jınaqtary bolýy shart: jınaqtar mindetti zeınetaqy jarnalary jáne (nemese) mindetti kásiptik zeınetaqy jarnalary jáne (nemese) EZJ esebinen bolýy múmkin.
Tólem merzimin dáleldi sebeptermen (áskerı qyzmetke ornalasý, depozıtordyń shetelde, bas bostandyǵynan aıyrý oryndarynda bolýy, mura qabyldaýy jáne sot anyqtaǵan ózge de mán-jaılar) ótkizip alǵan salymshy jazbasha ótinishpen jáne rastaýshy qujattarmen tikeleı Qorǵa júginedi.
Tolyq aqparatty salymshylar 1460 telefon nómiri, sondaı-aq Qordyń info@kdif.kz, kdif@kdif.kz elektrondyq poshtalaryna saýal jiberý nemese @kdif_ask Telegram-chatyna suraq qoıý arqyly alýǵa bolady.