Taraptar Sırııa boıynsha Astana protsesiniń aldaǵy kezdesýine qatysatynyn rastady

NUR-SULTAN. QazAqparat - Sırııa jónindegi Astana protsesiniń búkil taraptary 15-16 maýsymda Nur-Sultan qalasynda ótetin kelissózge qatysatynyn rastady, dep habarlaıdy QazAqparat.

Syrtqy saıası vedomstvonyń málimetinshe, kelissózge kepilger-memleketter – Reseı, Túrkııa jáne Iran, sondaı-aq Sırııa úkimeti men sırııalyq oppozıtsııa delegatsııalary qatysady.

Kezdesýge baqylaýshylar retinde BUU Bas hatshysynyń Sırııa jónindegi arnaıy ókili keńsesiniń saıası máseleler jónindegi bas qyzmetkeri Robert Dann, Iordanııa delegatsııasy, BUU Bosqyndar isteri jónindegi joǵarǵy komıssary basqarmasynyń jáne Halyqaralyq Qyzyl Krest komıtetiniń ókilderi qatysady.

Reseı delegatsııasy RF Prezıdentiniń Sırııa jónindegi arnaıy ókili Aleksandr Lavrentev, Túrkııa delegatsııasy SІM Kópjaqty departamentiniń bas dırektory Seldjýk Ýnal, Iran delegatsııasy SІM saıası máseleler jónindegi aǵa kómekshisi Alı Asgar Hadjı deńgeıinde qatysady.

Kelissózderdiń kún tártibine Sırııadaǵy jaǵdaı, onyń ishinde gýmanıtarlyq jáne áleýmettik-ekonomıkalyq ahýal, Jenevadaǵy sırııalyq konstıtýtsııalyq komıtet jumysynyń jandaný perspektıvalary, taraptar arasyndaǵy senimdi nyǵaıtý, kepilge alynǵandardy bosatý jáne iz-túzsiz joǵalǵandardy izdeý máseleleri enedi.

2022 jylǵy 15 maýsymda kepilger-elder sarapshylar deńgeıinde ekijaqty jáne úshjaqty konsýltatsııa ótkizýge nıetti.

16 maýsymda barlyq taraptardyń qatysýymen jalpy otyrys ótedi.