«Tar zaman» serıalynyń rejısseri Murat Bıdosov «Mádenıet salasynyń úzdigi» atandy

NUR-SULTAN. QazAqparat - Belgili rejısser, «Keıki mergen», «Tar zaman» serıaldarynyń rejısseri Murat Bıdosov Mádenıet jáne sport mınıstrliginiń «Mádenıet salasynyń úzdigi» tósbelgisimen marapattaldy, dep habarlaıdy QazAqparat Baq.kz resýrsyna sliteme jasap.

Murat Bıdosov - alash qaıratkerleriniń ómir jolyn, ultqa belgili áıgili tulǵalardyń taǵdyryn arqaý etken birneshe teleserıaldyń rejısseri.

Onyń «Tar zaman» serıaly «Qazaqstan» ulttyq telearnasynda kórsetilip, kórermen tarapynan oń baǵasyn alǵan bolatyn.

Sonymen birge, Murat Bıdosov taspalaǵan «Keıki mergen» serıaly da qoǵamda aıryqsha talqylanyp, 1916 jylǵy ult-azattyq qozǵalysynyń 100 jyldyǵyna oraı sol dáýirdegi tarıhı oqıǵalardy fılmge aınaldyrýdaǵy sátti qadam bolǵany aıtyldy.

Murat Bıdosov, sonymen qatar, «Tasótkel», «Bekzat», «Qalamger», «Aqyldyń kilti. Ómirdastan» qatarly el tarıhyndaǵy erekshe oqıǵalar men áıgili tulǵalar jaıly súbeli eńbekterdi dúnıege ákelgen edi.

Sonymen birge búgin taǵy bir alashshyl azamat «Mádenıet salasynyń úzdigi» tósbelgisimen marapattaldy. Ol — qaraǵandylyq ólketanýshy, Aqtoǵaı aýdany murajaıynyń burynǵy dırektory Tuńǵyshbaı Muqan.

Tuńǵyshbaı Muqan - alash arystaryn nasıhattaýshylardyń biri. Osy maqsatta birneshe ekspedıtsııa uıymdastyrǵan.

Sonymen birge ol Murat Bıdosov túsirgen «Tar zaman» teleserıalynyń keńesshileriniń biri bolǵan edi. Tuńǵyshbaı Muqan, ásirese, Álıhan Bókeıhannyń muralaryn zertteýde, ony nasıhattaýda aıryqsha eńbek etip kele jatqan azamat.