Tapanshamen qorqytty: Almatyda áıeldi tonap ketken kúdikti ustaldy

<p>ALMATY. KAZINFORM &ndash; Polıtseıler kóshede áıelge shabýyl jasaǵan 39 jastaǵy er adamdy ustady.</p>

Polıtsııa departamentinen málim etkendeı, qylmys búgin erteńgisin Almaly aýdanynda boldy. Turǵyn úıdiń aýlasynda belgisiz er adam áıeldi tapanshamen qorqytyp, 400 myń teńgesin alyp ketken.

«Kúdikti óziniń betin sharfpen japqan. Qylmys jasaǵannan keıin ol qashyp ketken. Dereý tergeý-jedel toby qurylyp, jedel-izdestirý sharalary uıymdastyryldy. Túske qaraı 39 jastaǵy kúdikti ustaldy. Arnaıy is-shara qala ortalyǵynda, Abylaı han dańǵylynyń boıynda júrgizildi. Qaskóıdiń shabýyldy josparlaǵany jáne úlken paıdaǵa úmittengeni belgili boldy. Qazir ol qamaýǵa alynyp, gaz tapanshasy tárkilendi», – dedi Almaty qalalyq polıtsııa departamenti bastyǵynyń birinshi orynbasary Qýatbek Naýatov.

Osyǵan deıin Almatyda beınekameralardyń kómegimen 2 myńnan astam qylmys ashylǵany týraly jazǵan edik.