Tanzanııada kólge qulaǵan ushaqtaǵy 19 jolaýshy qaza tapty

ASTANA. QazAqparat - Tanzanııa jolaýshylar ushaǵy Býkoba qalasynda jaǵalaýǵa qonyp jatqan kezde Vıktorııa kóline qulady. Ushaq bortynda 43 adam bolǵan, onyń kem degende 19-y mert boldy, dep habarlaıdy QazAqparat VVS agenttigine silteme jasap.

Buǵan deıin jedel qyzmet 26 adamdy, onyń ishinde 2 ushqyshty qutqaryp qalǵany habarlanǵan bolatyn.

Alaıda keıin eldiń premer-mınıstri ushqyshtardyń alǵan jaraqatynan qaza tapqanyn málim etti.

Precision Air avıakompanııasynyń ATR 42 jolaýshylar ortasha magıstraldyq ushaǵy Tanzanııanyń eń úlken qalasy Dar-es-Salamnan Mvanza arqyly Býkobaǵa ushqan bolatyn.

Oqıǵa kýágerleriniń biri Abdýl Nýrı Bı-bı-Sıge ushaqtyń sýǵa qulaǵanyn kórgenin aıtty.

«Naǵyz shok boldy. Bári dúrbeleńge tústi, al keıbireýler aıqaılap, jylaı bastady. Kútip alý aımaǵyndaǵylar da úreılene bastady», - dedi ol.

Nýrıdiń aıtýynsha, jergilikti balyqshylar ushaq sýǵa qulaǵannan keıin sonda júzip, stıýard ashqan artqy esik arqyly qutqaryp alǵan.

Apattyń sebebi - aýa raıynyń qolaısyzdyǵy, alaıda apattan keıin jańbyr toqtap, qutqarýshylar oqıǵa ornyna jetken.

Apattan keıin ushaq tolyq sýǵa batyp, tek artqy jaǵy sý betine shyǵyp turdy.

Eske salaıyq, buǵan deıin Tanzanııada jolaýshylar ushaǵynyń apatqa ushyraǵanyn jazǵan edik.

Foto: www.bbc.com