Tanymal vaınerler soty: Meıirjan Tórebaev óziniń áıelin qorǵaýshy retinde tartýdy surady

ALMATY. QazAqparat- Almatyda Mudarabah Capital qarjy pıramıdasyna qatysty istiń aldyn ala tyńdaý barysynda aıyptalýshylar men olardyń qorǵaýshylary sottan úıqamaq túrindegi bultartpaý sharasyn ózgertýdi, al keıbireýleri ózderine qatysty qylmystyq isti toqtatýdy surady, dep habarlaıdy QazAqparat tilshisi.

Sot otyrysyna 12 aıyptalýshy qatysty, oǵan sýdıa Kámshat Saýrova tóraǵalyq etti.

Kezdesýde sottalýshylardyń advokattary sýdıadan barlyq jábirlenýshilerdi onlaın shaqyrý múmkin bolmaǵandyqtan, kelesi kezdesýlerdi offlaın rejımine kóshirýdi surady.

Sot barysynda «Astex» JShS basshysy A.K., aıyptaý aktisimen kelispeı, sottan bultartpaý sharasyn úıqamaqqa ózgertýdi jáne isti qaıta qaraýdy surady. Ol qaterli isikke shaldyqanyn jáne kámeletke tolmaǵan úsh bala tárbıelep otyrǵanyn alǵa tartty. Sonymen qatar, sotqa deıingi tergeý barysynda onyń kompanııasy jábirlenýshilerge 300 mıllıon teńgeden astam aqsha tólegen. Onyń aıtýynsha, ol árbir ınvestormen jeke kezdesip, máseleni beıbit jolmen sheshýge daıyn.

Al «Mudarabah Capital» kompanııasynyń dırektory B. esimdi sottalýshy negizgi qatysýshylar jaýapqa tartylmady dep esepteıdi, sondyqtan ol sýdıadan «Astex KZ» JShS men «Qazaqstannyń Tender bırjasynyń» basshylary A.Q jáne Sh.Q, sonymen qatar, D.R esimdi áıeldi jaýapqa tartýdy surady. Sondaı-aq salymshylardan keshirim surady.

«Men osy kompanııanyń dırektory retinde Mudarabah Capital klıentterinen keshirim suraǵym keledi. Biz barlyq aqshany qaıtaramyz. Men sizderge ýáde berdim. Kishkene kúte turyńyzdar. Qazir meniń qolym baılaýly. Biraq kóp uzamaı aqshalaryńyzdy alasyzdar», – dep ýáde berdi.

Sot otyrysynda Meıirhan Shernııazovtyń da qorǵaýshysy sóz aldy.

«Qylmystyq is materıaldarymen tanysa kele, biz óz klıentterimizdiń áreketterinde qylmys quramynyń belgileri joq degen qorytyndyǵa keldik. Meıirhan Shernııazovtyń isi boıynsha jınalǵan materıaldardyń barlyǵy, kerisinshe, onyń kinásizdigin aıǵaqtaıdy. Shernııazovqa taǵylǵan aıyp tek onyń «Mudarabah Capital» JShS-niń quryltaıshysy jáne jarnama úshin aqshalaı ótemaqy alý faktisine negizdelgen. Mundaı syıaqy alý quqyǵy JShS jarǵysynda qarastyrylǵan», - deıdi ol.

Qorǵaýshylardyń pikirinshe, tergeý zań buzýshylyqtarmen jalǵasqan. Olar sottan óz klıentterine qatysty qylmystyq isti toqtatyp, jábirlenýshi dep tanýdy surady. Shernııazovtyń ózi de advokattaryn qoldady.

Meıirjan Tórebaevtyń ózi áıelin qorǵaýshy retinde tartýdy suraǵan. Ol sondaı-aq isti prokýrorǵa qaıtarý týraly ótinish berdi, óıtkeni sottalýshynyń aıtýynsha, tergeý zań buzýshylyqtarmen júrip jatyr.

Onyń qorǵaýshysy sottan Meıirjan Tórebaevqa qatysty bultartpaý sharasyn úıqamaqqa ózgertýdi surady. Ol kámeletke tolmaǵan tórt balasy bar ekenin jáne buryn qylmystyq jaýapkershilikke tartylmaǵanyn aıtty.

Aıta keteıik, 12 jeltoqsanda qarjy pıramıdasyn qurdy dep aıyptalǵan tanymal vaınerlerdiń isi sotqa joldanǵan bolatyn.

Qarjy pıramıdasy isi boıynsha, A. Oraz pen A. Saıdbaevqa halyqaralyq izdeý jarııalanǵan. Qadaǵalaý organynyń málimetinshe, qylmystyq istiń negizinde 41 jyljymaıtyn múlikke, 3 avtokólikke, 9 bank shotyna jáne 16 kompanııanyń jarǵylyq kapıtalyndaǵy ártúrli úlesterge tyıym salyndy. Eske salaıyq, Almaty qalalyq polıtsııa departamentiniń tergeý basqarmasy tanymal vaınerler Meıirjan Tórebaev pen Meıirhan Shernııazovqa QR Qylmystyq kodeksiniń 217-baby 3-bóligi boıynsha aıyp taqty.

Keıinnen Meıirjan Tórebaev pen Meıirhan Shernııazov ustaldy.

Foto: alashainasy.kz