Tanymal týrıstik oryndarda 490-nan astam qoǵamdyq dárethana jetispeıdi

ASTANA. QazAqparat - Mádenıet jáne sport mınıstrligi Qazaqstannyń týrıstik destınatsııalary men grand-týrlaryndaǵy ınfraqurylymnyń jaı-kúıine zertteý júrgizdi. Anyqtalǵan kemshilikterdi joıý úshin zertteý nátıjeleri men qosymsha usynystar ákimdikter men beıindi memlekettik organdarǵa jiberildi, dep habarlaıdy QazAqparat.

Atap aıtqanda, 493 dárethana men qoqys konteınerlerin ornatý, ınternet pen uıaly baılanys sapasyn arttyrý, týrıstik bazalarǵa deıin ishki joldardy salý qajet. Sonymen qatar mamandar vokzaldardy, janarmaı quıý stantsııalaryn, tamaqtaný pýnktterin jáne basqa da nysandardy tekserdi.

«Jergilikti atqarýshy organdar jaıly ınfraqurylymdy jaqsartý, kommýnıkatsııalar júrgizý jáne dárethanalar salý boıynsha jumysty jandandyrýy tıis», - dep jazdy mınıstrlikten.

Aıta keteıik, sanıtarlyq-gıgıenalyq toraptardy taza ustaý úshin memleket aı saıyn 83 myń teńge kóleminde sýbsıdııa berýge daıyn. Ákimdikter jibergen aqparatqa sáıkes, jergilikti kásipkerler tarapynan bul mehanızm boıynsha 11 ótinim maquldanǵan. Onyń úsheýi Aqmola oblysynan, ekeýi ShQO jáne Abaı oblystarynan, tórteýi Jambyl jáne Qaraǵandy oblystarynan, taǵy ekeýi Qostanaı oblysynan.