Tanymal tulǵalar men sheteldik elshiler jetim balalardyń tusaýyn kesti
QR Ulttyq mýzeıiniń bastamasymen qolǵa alynǵan «Tusaýkeser» qaırymdylyq jobasy bıyl tórtinshi ret uıymdastyrylyp otyr.
«Elbasy Nursultan Nazarbaev óziniń «Bolashaqqa baǵdar: Rýhanı jańǵyrý» baǵdarlamasynda tarıhymyz ben salt-dástúrimizdi saqtap qana qoımaı, dúnıe júzine keńinen nasıhattaýymyz kerektigin erekshe atap ótti. Naýryz - bizdiń tól merekemiz. Bul aıtýly merekeni jańa úlgide toılaý týraly usynys bildirgen bolatynmyn, onda búldirshinderge basa nazar aýdarylsa dedik. Sol sebepti tusaýkeser rásimi uıymdastyrylyp otyr. Sonymen birge, búgingi sharaǵa balalar úıinen jáne áleýmettik jaǵdaıy tómen otbasy balalary arnaıy shaqyryldy, olarǵa syı-sııapat berip, kóńilderin kótergimiz keledi»,- dedi QR Mádenıet jáne sport mınıstri Arystanbek Muhamedıuly «Naýryz - jańarý nyshany» shoý-baǵdarlamasynyń saltanatty ashylýynda.
Tusaýkeser rásimine №2 mamandandyrylǵan balalar úıinen Ramazan Nurhatov, Aıdyn Bekishev, Іnjý Bekisheva, Maksım Tretıakov, Arystan Begalı, Áljan Abdýov, Álibek Jamanqulov arnaıy keldi.
Olardyń tusaýyn QR Mádenıet jáne sport mınıstri Arystanbek Muhamedıuly men Qazaqstandaǵy EO ókildiginiń basshysy Sven-Olov Karlsson, QR Ulttyq mýzeıi dırektorynyń mindetin atqarýshy Almaz Nurazhan, «Qasıetti Qazaqstan» ǵylymı zertteý ortalyǵynyń basshysy Berik Ábdiǵalı, Tarıh ǵylymdarynyń doktory, professor Jambyl Artyqbaev, satırık Kópen Ámirbek, Qazaqstannyń eńbek sińirgen qaıratkeri, dástúrli ánshi Aıgúl Qosanova jáne shet memleketterdiń Qazaqstandaǵy elshilik ókilderi kesti.
«Tusaýkeser rásimi úshin jyl saıyn Naýryz merekesinde Ulttyq mýzeıge kelemiz. Bıyl tórtinshi ret balalarymyzdyń tusaýy kesilip, jaqsy tilekter aıtylyp jatyr. Kóp jaǵdaıda tusaýy kesilgen balalar jańa otbasylaryn tabady. Sol úshin Ulttyq mýzeıdegi uıymdastyrýshylarǵa alǵysymyz sheksiz», - dedi №2 mamandandyrylǵan balalar úıiniń tárbıeshisi, psıholog Gúljan Tólesova.
Tusaýkeserden soń, kontserttik baǵdarlama jalǵasyn taýyp, teatrlandyrylǵan qoıylym, aıtys óneri, án, bı, arqan tartys, kıiz basý jáne qolóner boıynsha sheberlik sabaqtary ótti.
Aıta keteıik, 21 naýryz kúni ulttyq kıim kıgender mýzeıge tegin kiredi. Bul úshin áleýmettik jelidegi (feısbýk - QR Ulttyq mýzeıi, ınstagram - Nationalmuseumkz, telegramm- QR Ulttyq mýzeıi) Ulttyq mýzeı paraqshalaryna tirkelip, #Ulttyqmýzeı heshtegin belgileý qajet.