Tanymal telejúrgizýshi Láılá Sultanqyzy Astanadaǵy kishkentaı attasynyń úıine bardy

Tanymal telejúrgizýshi Láılá Sultanqyzy Astanada ómirge kelgen kishkentaı attasy – Láılá Sultanqyzynyń úıine baryp, náresteniń ata-anasyna tosyn syı jasady, dep habarlaıdy QazAqparat tilshisi.

Telejúrgizýshi L. Sultanqyzynyń aıtýynsha, bıyl maýsym aıynda áleýmettik jelidegi paraqshasyna Sultan esimdi er azamat jaqynda kishkentaıly bolatynyn jáne ómirge qyz bala kelse, náresteniń atyn Láılá dep qoıýdy josparlap otyrǵanyn jazǵan. Al shilde aıynda náreste týǵannan keıin, balanyń týý týraly kýáliginiń kóshirmesin dálel retinde atalǵan paraqshaǵa qaıtadan salyp jibergen.

Osy oraıda, búgin tanymal telejúrgizýshi kishkentaı Láıláni quttyqtaý úshin qolyna gúli men syılyǵyn jáne bir jylǵa jetetindeı jórgek tıelgen qorapty alyp, elordanyń sol jaǵalaýyndaǵy turǵyn úılerdiń birine arnaıy bardy. Láılá Sultanqyzyn ózderiniń páterinde balanyń ata-anasy Sultan men Jadyra kútip aldy.

«Osyndaı oqıǵanyń ózi elge úlgi bolatyndaı dep aıta alamyn. Mundaı oqıǵalar adamdardy jaqyndastyra túsedi. Kóp adamdar «hat jazdym, biraq ony oqymaıdy» dep oılaıdy. Sizderdiń osy qýanyshtaryńyz jaıynda oqyp, óte rıza boldym. Kishkentaı qyzdaryńyz maǵan uqsasyn dep esimin de Láılá dep ataǵandaryńyzdy estip, kóz jasyma erik berdim. Sizder hatty óte áserli etip jazǵansyzdar», - dedi jýrnalıst L. Sultanqyzy.

Páterge kirgen boıda telejúrgizýshi eki aılyq Láıláni qolyna alyp, ystyq yqlasyn bildirip, aq batasyn berdi.

Aıta keteıik, qyzdyń ákesi 31 jastaǵy Sultan Muhıtuly elordaǵa 8 jyl buryn Tarazdaǵy áskerı bólimnen qyzmeti boıynsha aýysyp kelgen. 2015 jyly úılenip, qazir zaıyby Jadyra ekeýi tórt balany tárbelep otyr. Qazir ol Astana mańyndaǵy áskerı bólimde qyzmet etip jatyr.

«Úlken balamnyń esimin ákem qoıdy, ekinshi qyzdyń atyn naǵashy jaǵy berdi, al úshinshi balanyń esimin qaryndasym qoıdy. Osydan keıin aýyldaǵy ákeme telefon shalyp, kishi qyzymnyń esimin Láılá Sultanqyzy dep ataýǵa ruqsat suradym. Ákem esh qarsylyq bildirmeı, osy sheshimge batasyn berdi. Qyzymyz jaqsy adamǵa uqsasyn degen nıetpen balanyń atyn Láılá dep qoıdyq. Balany emhanadaǵy josparly tekserýge aparǵan kezde, dárigerler týý týraly kólikti ashyp, qyzymnyń esimi tanymal telejúrgizýshiniń aty-jónine uqsas ekenin kórip tańdanyp jatady. Búgin Láılá Sultanqyzy arnaıy bizdiń shańyraqqa kelip, quttyqtap jatqanyna óte qýanyshtymyz», - dedi Sultan.

Óz kezeginde telejúrgizýshi L. Sultanqyzy bul otbasynyń qazaqy tárbıesine tánti boldy.

«Qazir jastardyń keıbiri úlkenderden ruqsat suramaı, balanyń esimin ózderi qoıyp jatady. Sondyqtan, ruqsat bergen Sultannyń qart ata-anasyna myń alǵys», - dedi jýrnalıst.