Tanymal qazaqstandyqtar naýqas balalarǵa kómektesý úshin óz zattaryn satylymǵa shyǵara bastady (FOTO)

ALMATY. QazAqparat - Qazaqstandyq juldyzdar aýyr dertke shaldyqqan balalarǵa kómektesý úshin qaıyrymdylyq sharasyn uıymdastyrdy. «Júrekten - júrekke» jobasy aıasynda juldyzdar óz zattaryn jappaı satylymǵa shyǵardy.

Olardyń arasynda dızaıner Saltanat Baımuhamedova óziniń Salta kollektsııasyndaǵy jańa kóılekterin, dızaıner Maksım Akbarov telefon qabyn, «Dýet L» toby zergerlik áshekeı buıymdaryn, aktrısa Lında Nyǵmatýllına dızaınerlik kóılegin, radıojúrgizýshi Dıana Snegına sımvolıkalyq kádesyılaryn satty. Uıymdastyrýshylardyń aıtýynsha, qazirdiń ózinde 80-ge jýyq eksklıýzıvti zattar qoldan qolǵa ótip, naýqas balalarǵa paıdasyn tıgizbek. Kóptegen belgili telejúrgizýshiler, estrada juldyzdary, akterler «Júrekten - júrekke» jobasyn qoldaıtyndaryn bildirdi. Dıana Snegına, Lında Nyǵmatýllına, Gúlnar Sılbaeva, Sanjar Madıev, Maksım Akbarov, Aıqyn Tólepbergen, Maksım Kıchıgın, Saltanat Baımuhamedova, Zara Esenaman, Táńirbergen Berdońǵarov, Qarlyǵash Muhamedjanova, Dýet L, Ru-Me toptary aktsııaǵa qosylyp, arnaıy mataǵa ózderiniń alaqan tańbasyn qaldyrdy. Uıymdastyrýshylardyń aıtýynsha, joba bastalǵaly beri 6 aıda «UnityKZ» qory 5 mln teńge jınap alýdy josparlap otyr.