«Táńir qyzy» - Frantsııamen birlesken fılm Mańǵystaý óńirinde túsiriledi

AQTAÝ. QazAqparat - Qazaqstan men Frantsııanyń birlesken jobasy - «Táńir qyzy» qysqametrajdy fılmi Mańǵystaýda túsiriledi. Bul týraly Qoǵamdyq kommýnıkatsııa ortalyǵynda ótken brıfıngide fılmniń rejısseri Dana Mýsa aıtty, dep habarlaıdy QazAqparat tilshisi.

Qysqametrajdy art-fılmniń ıdeıasy – keń baıtaq qazaq dalasynda ertede taraǵan táńirshildik nanym-senimin jáne áıel adamnyń qoǵamdaǵy ornyn kórsetýge baǵyttalǵan.

«Fılm túsirilimi Mańǵystaý oblysynda 21 tamyzda bastalyp, bir aptaǵa sozylady. Osyǵan deıin túsirilgen «Kıeli bı» fılminiń túsirilimi de kıeli ólkede ótken edi. Ekinshi jobamyzdy da birinshi jobadaǵy komandamen bastap otyrmyz. Fılm operatory Aleksandr Merfı de Mańǵystaý ólkesi tabıǵatynyń sulýlyǵy qaıtalanbas, biregeı ekenin aıtyp, tańǵaldy. Álemniń biraz elin aralaǵan adamnan mundaı baǵa alý – men úshin maqtanysh», - dedi Dana Mýsa.

Fılm – Qazaqstan men Frantsııanyń birlesken jumysy. Onda qart baqsynyń óz qasıetin keıingi urpaqqa muraǵa qaldyrý jaıy kórsetiledi. Boıynda kúsh-qýatyn joǵaltqan qarııa óziniń salttyq bıin jas qyzǵa beredi. Osylaısha, ol qyz rýdyń tarıhyn jalǵastyra alady, ata-baba rýhtarymen baılanysta bolady.

Frantsııa prodıýseri Sebastıan Laglezdiń aıtýynsha, fılmniń uzaqtyǵy 15-20 mınýt. Daıyn fılm 2023 jyldyń kókteminde qalyń kórermenge jol tartady. Qysqametrajdy art-fılm bı salasyndaǵy konkýrstyq kınofestıvaldermen qatar, mýzeıde de erekshe laıf-performans nusqada kórsetilmek.

Foto: i.4pcdn.org