Tanymal áýe kompanııasy Olımpıadaǵa baılanysty 180 mln eýro shyǵynǵa ushyraýy múmkin

<p>ASTANA. KAZINFORM &ndash; Frantsýzdyq Air France KLM áýe kompanııasy Parıjdegi Olımpıada oıyndaryna baılanysty qarjylyq shyǵyn kólemin anyqtady.</p>

Air France-KLM basshylyǵy jolaýshylar Olımpıada oıyndarynyń aldynda jáne dúbirli doda ýaqytynda Parıjge kelýge tartynyp otyrǵanyn málimdedi. Sáıkesinshe, áýe kompanııasy ájeptáýir shyǵynǵa ushyramaq.

«Air France jáne Transavia France 2024 jyly Parıjde ótetin Olımpıada oıyndaryna baılanysty jazǵy maýsymda kiristiń tómendeýine tap bolyp otyr. Frantsııa astanasyna qatynaýǵa nıetti jolaýshylardyń sany Eýropanyń basqa iri qalalaryna qaraǵanda tómen. Qala men basqa baǵyttar arasyndaǵy saıahat ta ádettegi maýsym-tamyz aılaryndaǵy ortasha deńgeıden tómen. Sebebi, turǵyndar demalystaryn keıinge shegergen nemese balama saıahat josparlaryn qarastyrǵan sııaqty», - delingen áýe kompanııasynyń veb-saıtyndaǵy málimdemesinde.

Esterińizge salsaq, buǵan deıin Parıj Olımpıadasynyń bıletteri jappaı satyla bastaǵanyn jazǵan edik.