Qazaqstandyq ánshi Golden time Talent halyqaralyq baıqaýynda jeńiske jetti

<p>ASTANA. KAZINFORM &ndash; &nbsp; Qazaqstandyq ánshi Dınara Kaırgoja (Bısenova) brıtandyq Golden time Talent halyqaralyq baıqaýynda birinshi oryndy ıelendi.</p>

Óziniń qýanyshty jańalyǵymen bólisken ánshi bul jetistiginiń artynda úlken eńbek jatqanyn málimdedi.

Dınara Kaırgoja — ustaz, kompozıtor, ánshi ári aktrısa. Elimizdiń mádenıet qaıratkeri, QR Pedagogıkalyq ǵylymdar akademııasynyń múshesi, estradalyq vokaldan respýblıkalyq jáne halyqaralyq baıqaýlardyń jeńimpazy. Búginde Amerıka Qurama Shtattarynda turatyn otandasymyz muhıttyń arǵy jaǵynda ulttyq án ónerin nasıhattap, eki eldiń mádenı baılanysynyń damýyna úles qosyp júr.

Qazaqstandyq órenderge onlaın arqyly dáris berip, bar bilgenin úıretip júr.  

«Tórtkúl dúnıeniń talanttary bas qosqan baıqaýda ózimniń týyndymdy oryndadym. Ánin de, sózin de ózim jazdym. „Ókpe“ dep atalatyn bul shyǵarmam qazylar alqasynyń sheshimimen júldege laıyq dep tanyldy. Óte qýanyshtymyn. Bul meniń shyǵarmashylyq jolymdaǵy kezekti jeńis dep bilemin. Munymen toqtap qalmaımyn. Odan ári shyǵarmashylyq qanatymnyń damýyna úlken bir serpin boldy. Ónerimdi baǵalaǵan sheteldik uıymdastyrýshylarǵa úlken alǵysymdy bildirgim keledi», — deıdi óner ıesi.

Aıta keteıik, Dınara Kaırgojaǵa júlde ákelgen bul týyndy otandyq telearnalarda aldaǵy ýaqytta tusaýyn kesetin «Shyraǵyń sónbesin» tele hıkaıasynyń saýndtregine tańdap alynǵan.