Tanda.enbek.kz portalynda vakansııalar jármeńkesi ótip turady

ASTANA. QazAqparat – Qazaqstandyqtar úshin Tanda.enbek.kz portalynda bos jumys oryndarynyń onlaın-jármeńkeleri ótkizilip turady, dep habarlaıdy QazAqparat Eńbek jáne halyqty áleýmettik qorǵaý mınıstrligine silteme jasap.

Jármeńkelerdi ár óńirde qurylǵan Óńirlik mansap ortalyqtary uıymdastyratyn bolady.

Onlaın-jármeńkeler barysynda jumys berýshilerge ózderine qajetti mamandardy onlaın formatta tabýǵa múmkindik beriledi. Árbir jumys izdep júrgen adam óziniń túıindemesin jumys berýshige jiberip qana qoımaı, sonymen qatar onlaın-chat arqyly HR mamandarymen máselelerdi talqylap, vıdeosuhbat arqyly sóılese alady.

Jármeńkege qatysý úshin jumys berýshiler de, izdenýshiler de Tanda.enbek.kz portalynda tirkeýden ótýi qajet. Tolyq aqparat pen jármeńkelerdi ótkizý kestesi osy resýrsta jarııalanǵan.

«Osy ýaqytqa deıin Tanda.enbek.kz-te ártúrli qyzmet salalary úshin de, jekelegen óńirler úshin de birqatar onlaın-jármeńkeler ótkizilip, oǵan jalpy 110 jumys berýshi men 3 myńnan astam izdenýshi qatysty», - delingen mınıstrlik málimetinde.