«Tańbaly tas» qoryq-mýzeıiniń ókilderi týrıstiń shaǵymyna jaýap berdi
«2022 jyldyń 27 naýryzynda Іle ózenine jaqyn ornalasqan Tamǵaly-tasqa bardym. Bul jerge jyl saıyn kelip turamyn. Keshe qoıylǵan qorshaý men kirý úshin alynatyn aqy (adam basyna 500 teńge) meni tańǵaldyryp, jaǵymsyz áser qaldyrdy.
Usqynsyz kabınadan shyqqan bir adam ózin tanystyrmaı, jeke kýáligi men beıdjin kórsetpesten kirý aqysyn talap etti. Alaıda, onyń qolynda tólemaqy alý quqyǵyn beretin qujaty boldy. Ol maǵan fıskaldy túbirtek bergen joq. Sebebin elektr men ınternet joq dep túsindirdi. Maǵan bılet usyndy. Sonymen qatar, ol maǵan túbirtekti Uzynaǵashtaǵy kompanııanyń keńsesinen baryp alýdy usyndy», - dep jazady Facebook qoldanýshysy.
Onyń aıtýynsha, barlyq ǵımarat, sonyń ishinde ınspektor otyratyn kúzet orny, dárethana (jumys istemeıdi), qorshaýy qoryqqa saı bolýy kerek.
Qoryq-mýzeıiniń baspasóz qyzmeti ár pýnkt boıynsha jaýap berdi.
«Fıskaldy túbirtek boıynsha, biz túbirtekterdi qajet etetinderdiń barlyǵyna beremiz. Ókinishke oraı, sol kúni ol jerde kassa apparaty jumys istemedi. Al bul kisilerge eki bılet usynyldy. Baǵasy jazylǵan preıskýrant kórsetildi. Bizdiń qyzmetker qonaqtarǵa Uzynaǵashtaǵy keńsege baryp tekserýdi usynǵan joq. Ol keńsege qońyraý shalyp, chekti elektrondy túrde ala alatynyn aıtty. Sondaı-aq aýmaqqa kirý baǵasy 2018 jyldan beri 500 teńge.
Kólikke keler bolsaq, Bul tranzıttik jol. Aýyl sharýashylyǵy qyzmetkerleri men Tótenshe jaǵdaılar mınıstrliginiń mamandaryn kirgizbeýge qaqymyz joq.
Dárethana boıynsha, ol áli tolyqtaı iske qosylmady. Sebebi, sý men jaryq tartylǵan joq. Onymen jumys istep jatyrmyz.
Aýmaqty jabdyqtaý josparda bar. Alaıda ony bir aptada jóndeı almaımyz, sebebi qarjylyq shyǵyn ońaı emes. Mýzeıge kirýge alynatyn sol 500 teńge nysandy abattandyrýǵa ketedi: ákteýge, syrlaýǵa, tazalaýǵa», - dep jaýap berdi mýzeıden.
Sondaı-aq qoryq-mýzeıine aıyna orta eseppen 10-20 adam keletini aıtyldy. Byltyr munda 1500-ge jýyq týrıst kelgen.