Tańba tańdaý arqyly órkenıet jolyn tańdap otyrmyz - Darxan Qydyráli
«Jańa álipbı jańarǵan eldiń nyshany retinde kóneni kelmeske ketirip, sanany silkindiredi. Jadymyzdy jańǵyrtyp, tilge táýelsizdik alyp beredi. Mádenı tutastyqty ornyqtyryp, aqparat keńistigin derbestikke jeteleıdi. Álippe - mádenıettiń ólshemi, sonymen qatar ol ulttyń tańbasy, eldiktiń aıshyǵy, memlekettiń táýelsizdigi men tutastyǵyn aıqyndaıtyn sımvoldardyń biri. Bul turǵyda "tańba tańdaý - órkenıet jolyn da tańdaý" degen maǵyna beredi. Sondyqtan osy arqyly Máńgilik el muratyn tuǵyrly etetin tarıxı tańdaý jasaldy dep oılaımyz", - dep atap kórsetti Darxan Qydyráli.
«Mysaly, Qazaqstan, Kazahstan jáne sonyń transkrıptsııasy negizinde Kazakhstan dep jazamyz. Latyn qarpine kóshken jaǵdaıda muny Qazaqstan dep tildik ereksheligimizdi saqtaı otyryp, bir-aq sózben jazýǵa múmkindik alamyz», - dep dálel keltirdi sózine ol.
Onyń aıtýynsha, álippe almastyrý arqyly biz qosamjar orfografııadan qutylyp qana qoımaı, shet tilderinen engen sózderdi de ulttyq erekshelikterge ıkemdeı alamyz. Sondaı-aq, Latyn qarpin qazaq emlesi arqyly qabyldaý arqyly bul másele bir izge túspek.
«Orfografııalyq, orfoepııalyq tutastyq tildik tutastyqqa bastaıtynyn eskersek, bul túrli etnostardyń qazaqsha oqý arqyly til syndyrýyna, sóıtip memlekettik tildiń tóńiregine toptasýyna úlken septigin tıgizedi», - deıdi «Egemen Qazaqstan» gazeti» AQ basqarma tóraǵasy.
Sondaı-aq, Darhan Qydyráli qazirdiń ózinde latyn qarpi keńinen qoldanylyp júrgenin aıtty: «Qazirdiń ózinde elektrondy aqparat quraldarynda latyn qarpi keńinen qoldanylýda. Internet, áleýmettik jelilerde buǵan kóship ketkender az emes. Biraq olar latyn álippesin ártúrli paıdalanýda. Sondyqtan bilikti ǵalymdar tarapynan maquldanǵan jańa álippeniń tezirek enýi bul máseleni bir izge túsiredi».