Tamyzda Qazaqstan-Aýǵanstan bıznes forýmy ótedi

ASTANA. QazAqparat – Elordada 2-4 tamyz kúnderi Qazaqstan-Aýǵanstan bıznes forýmy ótedi. Bul týraly Syrtqy ister mınıstriniń orynbasary Qanat Týmysh málim etti, dep habarlaıdy QazAqparat tilshisi.

«2-4 tamyz aralyǵynda Astana qalasynda Qazaqstan-Aýǵanstan bıznes forýmy ótedi. Іs-sharaǵa eki eldiń memlekettik organdary, kvazımemlekettik sektor men iskerlik toptardyń 400-den asa ókili qatysady. Qazaqstan men Aýǵanstan arasyndaǵy qatynas tatý kórshilik, ózara senim men tıimdi yntymaqtastyqqa negizdelgen. Qazaqstan men Aýǵanstan halyqtary - tarıhı tamyry ortaq, ejelden beri bir aımaqty mekendep kele jatqan kórshiles, salt-dástúri men taǵamdary uqsas elder. Aýǵan halqy da bizder sekildi ál-Farabıdi maqtan tutyp, óz ata-babasy retinde qaraıdy», - dedi Qanat Týmysh Syrtqy ister mınıstrliginde ótken brıfıngte.

Sonymen qatar ol Aýǵanstan halqy shyn máninde tereń tarıhy men mádenıeti damyǵan el ekendigin basa aıtty.

«Olardyń qatarynan ıslam órkenıetiniń altyn ǵasyrlarynda kóptegen ǵulama shyqqan bolatyn. Jalpy, aýǵandyqtar óte eńbekqor halyq, keremet qolónershiler, zergerler, dıqanshylar. Qazaqstan Aýǵanstannyń táýelsiz, beıbit, beıtarapty demokratııalyq jáne gúldengen el retinde damyǵanyn qalaıdy», - dedi mınıstr orynbasary.